Hoxha nga Frëngova: Bletaria dëshmon se puna e koordinuar jep fryte

Zëvendësministri i Bujqësisë, Pylltarisë dhe Ekonomisë së Ujërave, Albrim Hoxha, qëndroi për vizitë në bletoren e familjes Ismaili në Frëngovë të Strugës, ku pa nga afër punën dhe përkushtimin e bletarëve, si edhe peshën që ka bletaria në zhvillimin e bujqësisë.

Në këtë takim u fol për vështirësitë dhe mundësitë e këtij sektori, ndërsa u vu në dukje edhe rëndësia që kanë bletët në pllenimin e kulturave bujqësore, në rritjen e prodhimtarisë dhe në ruajtjen e ekosistemit.

“Bletët na kujtojnë se puna e organizuar sjell rezultate. Në një koshere secila e ka rolin e vet dhe kontribuon për të mirën e përbashkët. Kjo është një vlerë nga e cila mund të mësojmë të gjithë”, theksoi Hoxha.

Ai nënvizoi gjithashtu se bletaria nuk përfaqëson vetëm prodhimin e mjaltit, por shkon shumë përtej kësaj, ndërsa shtoi se institucionet duhet të vijojnë hartimin e politikave që mbështesin punën, prodhimin dhe zhvillimin, duke u mbështetur në nevojat reale të prodhuesve dhe në komunikim të pandërprerë me njerëzit që krijojnë vlerë në terren.

Sipas Hoxhës, kontributi i bletarëve është i rëndësishëm për zhvillimin e bujqësisë dhe të ekonomisë lokale, ndaj edhe mbështetja për bletarinë mbetet pjesë e angazhimeve për një sektor bujqësor më produktiv dhe më konkurrues.

Ai shprehu respekt për familjen Ismaili dhe për të gjithë bletarët, të cilët me punën, durimin dhe përkushtimin e tyre japin një ndihmesë të çmuar për bujqësinë dhe ekonominë lokale.