Hoxha: Agjenda e Gjelbër duhet të sjellë ndryshime konkrete për qytetarët e Ballkanit Perëndimor

Ministri i Mjedisit Jetësor dhe Planifikimit Hapësinor (MMJPH), Muamet Hoxha, po merr pjesë në Takimin e Tretë Ministror për Agjendën e Gjelbër për Ballkanin Perëndimor (GAWB), që zhvillohet më 18 dhe 19 shtator në Zhabljak të Malit të Zi. Takimi organizohet në kuadër të kryesimit të Malit të Zi me Procesin e Berlinit gjatë vitit 2026, njoftoi MMJPH.

Gjatë sesionit kryesor me temë “Agjenda e Gjelbër për Ballkanin Perëndimor, nga zotimet drejt zbatimit”, Hoxha rikonfirmoi angazhimin e Maqedonisë së Veriut për Agjendën e Gjelbër dhe integrimin evropian. Ai tha se faza e ardhshme duhet të përqendrohet te zbatimi praktik, investimet dhe bashkëpunimi mes vendeve të rajonit.

Sipas ministrit, Agjenda e Gjelbër duhet të shndërrohet gjithnjë e më shumë në një mekanizëm për zbatimin e projekteve rajonale, dhe jo të mbetet vetëm një forum dialogu. Hoxha vuri në dukje se ndotja nuk respekton kufijtë dhe se rreziqet klimatike prekin të gjithë rajonin, duke kërkuar zgjidhje të përbashkëta, shkëmbim të njohurive dhe të dhënave, përafrim të standardeve dhe ndërtim të infrastrukturës rajonale kur një gjë e tillë është e arsyeshme.

Hoxha theksoi se përparimi nuk duhet të vlerësohet nga numri i dokumenteve të miratuara, por nga ndryshimet e prekshme që përmirësojnë jetën e qytetarëve në të gjithë Ballkanin Perëndimor.

Ndër prioritetet e Maqedonisë së Veriut për periudhën e ardhshme, ministri përmendi rritjen e ritmit të investimeve në energjinë nga burimet e ripërtëritshme dhe efikasitetin energjetik, përmirësimin e qeverisjes klimatike dhe përgatitjen për kornizën evropiane për klimën. Në listë përfshihen gjithashtu tranzicioni i drejtë për zonat që varen nga qymyri, avancimi i reformave për menaxhimin e mbetjeve dhe ekonominë qarkore, si dhe forcimi i masave për përshtatjen ndaj ndryshimeve klimatike, mbrojtjen e natyrës dhe ruajtjen e biodiversitetit.

/Telegrafi/