Haxhi Vasileva synon ndjekje penale më efikase dhe më vendimtare

Iskra Haxhi Vasileva, e sapozgjedhur në krye të Prokurorisë Themelore Publike për Ndjekjen Penale të Krimit të Organizuar dhe Korrupsionit (PTHP NPKOK), e renditi ndjekjen penale efikase dhe përdorimin maksimal të burimeve të disponueshme ndër përparësitë e saj në luftën kundër krimit të organizuar dhe korrupsionit.

Haxhi Vasileva i bëri këto deklarata sot, pasi dha deklaratën solemne për marrjen e detyrës para Këshillit të Prokurorëve Publikë. Ajo tha se i ka përcaktuar tashmë prioritetet dhe se e njeh mirë situatën në fushën që mbulon Prokuroria.

Sipas saj, burimet në dispozicion janë të kufizuara në disa aspekte. Për këtë arsye, ajo synon të sigurojë burime shtesë, ndërsa ato ekzistuese të përdoren sa më me efikasitet për të arritur rezultate më të suksesshme.

E pyetur për vlerësimin në raportin e fundit të Komisionit Evropian, sipas të cilit nuk ka përparim në luftën kundër korrupsionit, drejtuesja e re tha se është e vetëdijshme për sfidat e kontekstit aktual. Ajo u shpreh se do të përpiqen të sigurojnë ndjekje penale më efikase dhe më vendimtare në rastet ku nevoja është më e madhe, veçanërisht në ato që prekin interesin publik dhe kanë rëndësi për qytetarët e shoqërinë në tërësi.

Haxhi Vasileva u zgjodh drejtuese e PTHP NPKOK-së në zgjedhjet e 28 tetorit të këtij viti. Ajo mori 64 vota nga 171 fletëvotime të vlefshme. Për këtë post kandiduan pesë prokurorë publikë: Faton Azizi, Trajçe Pelivanov, Lidija Raiçeviq, Iskra Haxhi Vasileva dhe Jovan Cvetanovski.