Hapet terminali i rikonstruktuar i aeroportit të Ohrit, Mickoski: Maqedonia sot është më e mirë se para tre vitesh

Terminali i rinovuar i aeroportit të Ohrit “Shën Apostol Pali” është vënë zyrtarisht në përdorim. Në ceremoninë e hapjes, kryeministri Hristijan Mickoski deklaroi se aeroporti po hyn në një fazë të re për sa i përket dinamikës dhe cilësisë së shërbimeve.

Sipas tij, pritet që gjatë periudhës së ardhshme të shtohet si numri i udhëtarëve, ashtu edhe numri i kompanive ajrore që do të shfrytëzojnë shërbimet e aeroportit të Ohrit.

Mickoski e cilësoi këtë aeroport si një nyje me rëndësi për zhvillimin e rajonit, të Maqedonisë si shtet, por edhe të Ohrit, Strugës dhe komunave të tjera përreth. Ai theksoi se përmirësimi i lidhjeve dhe infrastrukturës aeroportuale ndikon drejtpërdrejt në rritjen ekonomike.

Kryeministri tha se, bazuar në informacionet e marra nga përfaqësuesit e TAV aeroporteve, të cilët sipas tij kanë bërë një punë mbresëlënëse në Maqedoni gjatë viteve të fundit, aeroporti “Shën Apostol Pali” po shënon rekorde këtë vit.

Ai përmendi se ka pasur ditë me mbi 3 mijë pasagjerë, shifra më e lartë e regjistruar deri tani në një ditë, si dhe ditë me më shumë se 20 fluturime, duke e vlerësuar këtë si një tregues të rëndësishëm.

Mickoski shprehu bindjen se, falë punimeve ndërtimore dhe mbështetjes së qeverisë, këto shifra do të dyfishohen në të ardhmen. Ai njoftoi gjithashtu se Qeveria do të vijojë investimet në infrastrukturë, me synimin që Maqedonia të shndërrohet në një kryqëzim rajonal.

“E di se ende përballemi me shumë probleme që duhet t’i zgjidhim dhe se ndoshta jeta nuk është ende në nivelin që dëshirojmë. Megjithatë, jam i bindur se, përmes investimeve dhe aktiviteteve të ndërmarra nga qeveria, Maqedonia sot është një vend shumë më i mirë për të jetuar sesa ishte para tre vitesh”, deklaroi Mickoski.

Ai shtoi se kjo bindje mbështetet te motivimi i madh i qeverisë dhe te mbështetja që, sipas tij, po merr nga qytetarët, çka e nxit të vijojë punën me intensitet edhe më të madh.