Goditet grupi kriminal në Prilep, 21 persona kallëzohen për trafik droge dhe pastrim parash

Ministria e Punëve të Brendshme e Maqedonisë së Veriut ka njoftuar se një grup i organizuar kriminal me 21 anëtarë është shkatërruar gjatë një operacioni policor të zhvilluar më 30 shtator, pas një hetimi disa mujor.

Grupi përbëhej nga 20 persona nga Prilepi dhe një nga Shkupi. Sipas MPB-së, anëtarët e tij dyshohet se për një periudhë të gjatë kanë qenë të përfshirë në tregtinë e paligjshme të drogës dhe në krimin ekonomik.

Operacioni përfshiu kontrolle në 36 lokacione: 33 në Prilep, dy në Shkup dhe një në Strugë. Në total u kontrolluan 31 persona, ndërsa 20 prej tyre u privuan nga liria.

Gjatë bastisjeve, autoritetet sekuestruan lëndë narkotike, armë e municion, para në denarë dhe valuta të huaja, automjete, motoçikleta, telefona celularë, peshore, mulli metalikë dhe pajisje të tjera.

Hetimet e MPB-së kanë nxjerrë në pah se N.V. dhe M.S. dyshohet se kanë themeluar dhe drejtuar grupin, i cili vepronte përmes një rrjeti shpërndarësish.

Sipas autoriteteve, N.V. siguronte kokainë dhe marihuanë nga persona të paidentifikuar me origjinë nga Shqipëria, Struga dhe Dibra. Më pas, lëndët narkotike ruheshin në lokacione të sigurta në Shkup dhe Prilep, prej nga organizohej shpërndarja përmes rishitësve.

Rrjeti dyshohet se kishte blerës në Prilep, Manastir, Kavadar, Negotinë, Veles dhe Shkup.

MPB-ja bën të ditur se një gram marihuanë shitej për 500 deri në 800 denarë, ndërsa një gram kokainë kushtonte nga 4.000 deri në 6.000 denarë.

Edhe M.S. dyshohet se ndiqte të njëjtën skemë, duke siguruar kokainë dhe marihuanë nga persona nga Dibra dhe Gostivari dhe duke i shpërndarë përmes një rrjeti shitësish.

Paratë e përfituara nga shitjet, sipas policisë, u dorëzoheshin drejtuesve të dyshuar të grupit. Një pjesë e tyre u jepej shitësve si shpërblim, ndërsa më pas përdorej për blerjen e pasurisë së luajtshme dhe të paluajtshme.

“Paratë nga shitja ia jepnin N.V.-së, i cili si shpërblim u jepte një pjesë të parave, të cilat më pas i përdornin për blerjen e pasurisë së luajtshme dhe të paluajtshme”, thuhet në njoftimin e MPB-së.

Hetimi përfshin edhe dyshime për pastrim parash. Autoritetet thonë se gjatë viteve 2025–2026, pesë persona kanë futur në qarkullim legal mjete financiare që dyshohet se burojnë nga trafikimi i drogës.

Shuma e përfshirë arrin në 4.990.270 denarë dhe 64.670 euro.

Sipas MPB-së, synimi ishte fshehja e lëvizjes së mëtejshme dhe e vendndodhjes së parave, përmes futjes së tyre në qarkullimin legal dhe vënies sërish në qarkullim.

Për të 21 personat është dorëzuar kallëzim penal në Prokurorinë Themelore Publike për Ndjekjen e Krimit të Organizuar dhe Korrupsionit. Disa prej tyre dyshohen për prodhim dhe trafikim të paligjshëm të drogës, ndërsa të tjerë edhe për pastrim parash.

Mes personave të përfshirë është edhe B.I., 62 vjeç. Sipas MPB-së, ai ndodhet në paraburgim në Francë për një vepër penale të paraparë nga neni 215 i Kodit Penal./Telegrafi/