Gjorgjievski propozon shpërblime për denoncimin e hedhjes së paligjshme të mbeturinave

Gjatë ditëve të fundit, në qendër të vëmendjes janë vendosur videot ku shfaqen qytetarë të papërgjegjshëm duke hedhur mbeturina në hapësira publike dhe lumenj.

Reagimet për pamjet e gruas që derdh mbeturina në Lepenc vijojnë, ndërsa ndërkohë është regjistruar edhe një tjetër rast i ngjashëm. Videoja tregon dy persona me një motor dhe rimorkio, të cilët ndalojnë dhe e zbrazin ngarkesën me mbeturina drejtpërdrejt në rrugë.

Kryetari i Qytetit të Shkupit, Orce Gjorgjievski, deklaroi se po shqyrtohen mënyra për t’i nxitur qytetarët që t’i depozitojnë mbeturinat sipas rregullave. Mes mundësive që po analizohen është edhe dhënia e shpërblimeve për personat që fotografojnë ose incizojnë raste të hedhjes së parregullt dhe më pas i raportojnë ato.

“Unë nuk kam 2500 apo 5000 inspektorë për t’i mbikëqyrur të gjitha lokacionet. Sa i përket Drislës, në seancën e ardhshme do t’i propozoj Këshillit të Qytetit të Shkupit që, një ose dy ditë në muaj, mbeturinat të dërgohen pa pagesë. Gjithashtu, mendoj se nuk do të ishte propozim i keq që të caktojmë një shumë parash për qytetarët që, përmes fotografive, do të denoncojnë sjellje të tilla”, tha kryetari i Qytetit të Shkupit, Orce Gjorgjievski.

Gjorgjievski njoftoi gjithashtu se procedura për instalimin e kamerave në mbi 200 lokacione të qytetit është pranë përfundimit. Pajisjet do të vendosen në zonat ku krijohen deponi të egra, por edhe në parqe dhe kënde lojërash për fëmijë.