Gjorgjievski: Ndihma financiare për mbi 1.200 pacientë onkologjikë është kryer ose përfundon nesër

Mbi 1.200 pacientë onkologjikë kanë paraqitur kërkesë në kuadër të thirrjes për mbështetje financiare, ndërsa pagesat për aplikuesit që kanë përmbushur kriteret janë realizuar ose pritet të përfundojnë gjatë ditës së nesërme, bëri të ditur kryetari i Shkupit, Orce Gjorgjievski.

Sipas tij, çdo kërkesë është shqyrtuar me vëmendje dhe përkushtim, në mënyrë që ndihma të shkojë te personat që kanë nevojën më të madhe.

“Ka raste kur fjalët janë të pamjaftueshme. Ka çaste kur njerëzillëku nuk vlerësohet nga ajo që themi, por nga gatishmëria për t’i zgjatur dorën dikujt kur përballet me vështirësitë më të mëdha”, deklaroi Gjorgjievski.

Thirrja për ndihmë financiare vazhdon të jetë e hapur. Pacientët që i plotësojnë kushtet, por nuk kanë paraqitur ende aplikim, mund ta bëjnë këtë.

Kryetari i Shkupit tha se pas çdo shifre qëndron një person dhe një familje që po kalon një përballje të rëndë me jetën. Për këtë arsye, ai vlerësoi se përkrahja nga institucionet duhet të shprehet përmes veprimeve dhe jo të kufizohet vetëm te deklaratat.

“Është përgjegjësia jonë njerëzore dhe institucionale të qëndrojmë pranë bashkëqytetarëve tanë jo vetëm përmes fjalëve, por edhe me hapa konkretë, kujdes dhe mbështetje”, theksoi kryetari.

Gjorgjievski shtoi se synimi është që asnjë pacient apo familje të mos përjetojë ndjesinë e vetmisë në periudhën më të vështirë për ta.