Gashi për garën në Bërvenicë: Le të triumfojë kandidati më i mirë, pa ndikime partiake e etnike

Kryetari i Kuvendit, Afrim Gashi, komentoi zgjedhjet lokale në Bërvenicë, të planifikuara për 1 nëntor, ku përballen kandidati i OBRM-PDUKM-së dhe kandidati i AKI-së.

Sipas Gashit, votuesit nuk duhet ta përcaktojnë zgjedhjen mbi baza etnike apo partiake, pasi në zgjedhjet lokale vëmendja duhet të përqendrohet te zgjidhja e problemeve thelbësore të qytetarëve.

Ai u shpreh se është koha që të kapërcehen ndarjet provinciale dhe etnike, veçanërisht në procese zgjedhore lokale. Gashi theksoi se, edhe pse partitë shpesh e vendosin përkatësinë etnike në qendër të vendimit për votën, qytetarët duhet të shqyrtojnë programin dhe të mbështesin kandidatin më të mirë.

Gashi tha gjithashtu se kultura politike duhet të përparojë, edhe pse vendi ende nuk ka arritur në nivelin e dëshiruar. Ai uroi që fitorja t’i takojë kandidatit më të mirë dhe atij që do t’u shërbejë të gjithë qytetarëve, pavarësisht përkatësisë partiake, etnike apo religjioze./Telegrafi/