Gashi dhe Hilal diskutojnë për barazinë gjinore, përfshirjen e të rinjve dhe luftën ndaj dhunës digjitale

Kryetari i Kuvendit, Afrim Gashi, zhvilloi një takim me Zeina Hilal, drejtoreshë e Programit për Programet Gjinore dhe të Rinisë pranë Unionit Interparlamentar (UIP), në prag të ngjarjes së nesërme me temë “Avancimi i barazisë gjinore dhe lufta kundër dhunës digjitale ndaj grave në politikë në Maqedoninë e Veriut”.

Sipas kabinetit të Gashit, diskutimet u përqendruan te sfidat aktuale në fushën e barazisë gjinore, rritja e përfshirjes së të rinjve në jetën publike dhe politike, si dhe sigurimi i mundësive për pjesëmarrjen e tyre aktive dhe të barabartë në vendimmarrje.

Një pjesë e veçantë e bisedës iu kushtua vështirësive që gratë dhe të rinjtë hasin në hapësirën digjitale, përfshirë dhunën digjitale dhe format e ndryshme të diskriminimit. Në këtë drejtim, u nënvizua domosdoshmëria e përmirësimit të vazhdueshëm të mekanizmave institucionalë për parandalim dhe mbrojtje, si dhe e rritjes së ndërgjegjësimit për identifikimin dhe parandalimin e çdo forme dhune e pabarazie.

Gjatë takimit u trajtua gjithashtu ndikimi i stereotipeve gjinore në mundësitë e grave për pjesëmarrje të barabartë në jetën publike. Bashkëbiseduesit vlerësuan se është e rëndësishme të krijohet një mjedis ku gratë dhe të rinjtë të kenë shanse të barabarta për të kontribuar në proceset demokratike dhe në hartimin e politikave.

Gashi dhe Hilal ranë dakord se Kuvendi dhe Unioni Interparlamentar duhet të vijojnë punën për forcimin e bashkëpunimit institucional, si dhe për shkëmbimin e përvojave dhe praktikave të mira. Sipas tyre, angazhimi i përbashkët për këto çështje ka rëndësi të madhe për ndërtimin e një shoqërie ku barazia, përfshirja dhe respektimi i të drejtave të njeriut përbëjnë vlera themelore.

Kabineti i Gashit theksoi se vijimi i bashkëpunimit me UIP-në ndihmon në krijimin e një hapësire më të sigurt, më të barabartë dhe më gjithëpërfshirëse për gratë dhe të rinjtë, duke u mundësuar atyre pjesëmarrje aktive në jetën publike dhe kontribut të plotë në zhvillimin e shoqërisë demokratike.