Flakët përfshijnë aksin rrugor Veles – Shtip

Forcat e shumta të angazhuara në shuarjen e zjarrit në lokalitetin “Dorutovec” të rajonit të Velesit, përfshirë avionin zjarrfikës “air tractor” të Drejtorisë për Mbrojtje dhe Shpëtim, ekipet e Departamentit të Zjarrfikësve të Velesit, banorët e fshatit Çaloshevë dhe një njësi me autocisternë nga Ndërmarrja Publike “Derven”, kanë arritur të pakësojnë kërcënimin, por fatkeqësisht fronti i flakëve është shtrirë drejt rrugës Veles – Shtip.

Për pasojë, retë e dendura të tymit që shtyhen nga era mbi autostradë e kanë detyruar Shtabin Kryesor të Menaxhimit të Krizave t’i drejtohet Ministrisë së Brendshme për ndihmë, me qëllim rregullimin e qarkullimit të mjeteve sipas kushteve të krijuara.

Nga DMSH-ja bëhet me dije se zhvillimet po ndiqen vazhdimisht nga Shtabi Kryesor i Menaxhimit të Krizave, në bashkëpunim të ngushtë me forcat që ndodhen në terren.

Ndërkaq, në shkallë vendi janë regjistruar edhe vatra të tjera zjarri. Sipas të dhënave të Qendrës së Menaxhimit të Krizave deri në orën 18:00, janë evidentuar gjithsej 9 zjarre në hapësira të hapura, prej të cilëve 4 mbeten aktivë dhe asnjë nuk është vënë nën kontroll të plotë, ndërsa 5 raste janë shuar plotësisht.