Flakët përfshijnë aksin rrugor Veles – Shtip, ndërhyrja emergjente vijon

Zjarrfikësit nga Velesi, së bashku me banorët e fshatit Çaloshevë dhe një skuadër të Ndërmarrjes Publike “Derven” të pajisur me autobot, u angazhuan në shuarjen e vatrës në lokalitetin “Dorutovec” të rajonit të Velesit. Përkrah tyre ndërhyri edhe avioni i specializuar “air tractor” nga Drejtoria për Mbrojtje dhe Shpëtim, duke arritur që të zbusë rrezikun, megjithatë fronti i zjarrit ka avancuar drejt segmentit rrugor Veles – Shtip.

Era po e shtyn tymin në drejtim të autostradës, çka ka shtyrë Shtabin Kryesor të Menaxhimit të Krizave t’i drejtohet Ministrisë së Brendshme për ndihmë, në mënyrë që qarkullimi i automjeteve të përshtatet sipas dinamikës së situatës.

Autoritetet e krizave po mbikëqyrin vijimisht zhvillimet, duke bashkërenduar veprimet me forcat që ndodhen në terren.

Ndërkohë, në shkallë vendi janë shënuar edhe vatra të tjera zjarri. Sipas të dhënave të Qendrës së Menaxhimit të Krizave deri në orën 18:00, janë regjistruar 9 zjarre në hapësira të hapura, prej të cilëve 4 mbeten aktivë dhe asnjë nuk është nën kontroll të plotë, teksa 5 të tjerë janë neutralizuar.