Filipçe propozon veting për të gjithë zyrtarët, nga vetja dhe Zaev te Sheqerinska e Mickoski

Një proces verifikimi që do të përfshijë pa përjashtim të gjithë zyrtarët, si ata të mëparshëm, ashtu edhe ata aktualë, është pjesë e Master Planit të LSDM-së për drejtësinë. Kryetari i partisë, Venko Filipçe, tha në emisionin “Telma” se ligji i posaçëm për vetingun do të zbatohej fillimisht ndaj tij.

“Ligj të veçantë për veting, ku unë do të jem i pari, por edhe të gjithë të tjerët nga koha e LSDM-së, përfshirë Zoran Zaevin, Radmilla Sheqerinskën dhe Petre Shilegovin. Le të shqyrtohen dhe të kontrollohen të gjithë. I njëjti proces duhet të vlejë edhe për zyrtarët aktualë të OBRM-PDUKM-së, me në krye kryeministrin Hristijan Mickoski”, deklaroi Filipçe.

Sipas tij, në kuadër të planit parashikohet angazhimi i ekspertëve të huaj, si dhe verifikimi i pasurisë dhe prejardhjes së saj.

Kontrolli do të shtrihet edhe te kompanitë më të mëdha që gjatë 10 viteve të fundit kanë bashkëpunuar me shtetin dhe kanë realizuar fitime shtesë. Filipçe tha se ligji do të përmbajë dispozita të veçanta për taksimin shtesë të këtyre fitimeve, duke theksuar se kompanitë kanë vepruar në përputhje me ligjin.

“Do të ketë ekspertë të huaj, kontroll të pasurisë dhe të origjinës së saj, përfshirë edhe pronën e kompanive të mëdha që kanë punuar me shtetin dhe kanë krijuar fitime shtesë në dekadën e fundit. Kemi multimilionerë të krijuar në kurriz të shtetit dhe paratë do të rikthehen në buxhet”, u shpreh ai.

Gjatë prezantimit të prioriteteve të Master Planit, Filipçe përmendi edhe vijimin e rrugës evropiane, bashkëpunimin me Zyrën e Prokurorit Evropian dhe rishikimin e rasteve të ndërlikuara. Ai tha se rikthimi i drejtësisë, lufta kundër korrupsionit dhe integrimi evropian synojnë të rindërtojnë besimin e qytetarëve./Telegrafi/