Filipçe paralajmëron nismë të re për pagë minimale prej 600 eurosh

Venko Filipçe, kryetar i LSDM-së, bëri të ditur sot se grupi parlamentar i partisë do të dorëzojë sërish javën e ardhshme një propozimligj për rritjen e pagës minimale në Maqedoni. Nisma parashikon që shuma aktuale prej 26 mijë denarësh të ngrihet në 36 mijë denarë, përkatësisht në 600 euro.

Në një deklaratë për mediat nga Kuvendi, Filipçe theksoi se Buxheti përmban mjete të mjaftueshme për realizimin e kësaj mase. Sipas tij, njëkohësisht mund të subvencionohen subjektet private për kontributet e sigurimit shëndetësor dhe pensional mbi kufirin e tanishëm të pagës minimale.

Kreu i LSDM-së këmbënguli se fondet e nevojshme për rritjen e pagës minimale ekzistojnë.

Filipçe deklaroi se do të mjaftonte që qeveria të hiqte dorë nga luksi, ku përfshihet edhe blerja e një aeroplani të ri qeveritar, në mënyrë që paratë të siguroheshin pa vështirësi. Ai shtoi se kjo do të ndihmonte sadopak në përmirësimin e standardit të jetesës së qytetarëve, veçanërisht përpara vjeshtës dhe dimrit, kur shpenzimet mujore rriten ndjeshëm.