Filipçe: Mickoski do të jetë i radhës pas rrëzimit të Orbanit dhe Vuçiqit

Kryetari i LSDM-së, Venko Filipçe, deklaroi se lidhja politike mes Viktor Orbanit, Aleksandar Vuçiqit dhe Hristijan Mickoskit është krijuar shumë kohë më parë, që kur ky i fundit ndodhej në opozitë. Sipas tij, mbështetja mediatike dhe financiare e Orbanit dhe Vuçiqit ishte vendimtare për ardhjen e Mickoskit në pushtet.

Në një prononcim për „Fokus”, Filipçe u ndal te qëndrimi i përsëritur së fundmi nga partia e tij pas zhvillimeve zgjedhore në Serbi: pas largimit të Orbanit dhe Vuçiqit, sipas LSDM-së, në radhë do të jetë kryeministri maqedonas.

“Kjo lidhje nuk është krijuar tani, por daton që nga periudha kur Mickoski ishte në opozitë. Ai arriti në pushtet falë ndihmës së Orbanit dhe Vuçiqit, si përmes mediave, ashtu edhe në aspektin financiar. Për këtë nuk kemi folur vetëm tani; gjatë dy viteve të fundit kemi bërë vazhdimisht paralajmërime. Ajo që kemi paralajmëruar është vërtetuar”, u shpreh Filipçe.

Ai solli në vëmendje disa prej çështjeve për të cilat, sipas tij, LSDM-ja kishte paralajmëruar më herët. Në këtë kuadër përmendi edhe kredinë e madhe të siguruar përmes Hungarisë, për të cilën pretendon se në të vërtetë financohet nga para kineze.

“Ne ishim të parët që ngritëm shqetësimin për natyrën e kësaj kredie të madhe të marrë përmes Hungarisë, e cila në fakt përbëhet nga para kineze. Tani kryeministri i ri hungarez ka hapur një hetim për të përcaktuar se kush i ka marrë komisionet e mëdha dhe si janë shpërndarë ato në kuadër të kësaj marrëveshjeje. Është e dukshme se zbardhja e kësaj çështjeje sapo ka nisur”, deklaroi ai.

Filipçe kritikoi edhe mënyrën se si Qeveria ka përcaktuar prioritetet infrastrukturore, duke thënë se hekurudha e Korridorit 10 është favorizuar në raport me Korridorin 8. Ai pretendoi se qeveria e Mickoskit e ka bllokuar praktikisht zbatimin e Korridorit 8, pavarësisht se ky projekt konsiderohej prioritet i Evropës dhe NATO-s, ndërsa Maqedonia e Veriut humbi një grant evropian prej 40 milionë eurosh.

Duke folur për ndikimin mbi mediat, kreu i LSDM-së pretendoi se rreth 40 për qind e portaleve në vend, si edhe një televizion, kontrollohen nga persona të afërt me ish-kryeministrin hungarez. Përsa i përket Serbisë, ai ngriti shqetësimin për hyrjen në tregun vendas të mediave serbe që, sipas tij, nuk ishin të regjistruara, por megjithatë siguruan licenca për të ushtruar veprimtarinë në Maqedoninë e Veriut.

“Çfarë prove më të fortë mund të ketë sesa fakti që në vend u lejuan të hyjnë media serbe të paregjistruara, të cilave iu dhanë licenca pune? Ky është një shkelje jashtëzakonisht e madhe, të cilën pushteti është i detyruar ta kryejë për shkak të koncesioneve të mëdha që ka ndaj këtyre dy personave”, pretendoi Filipçe.

Gjatë intervistës, ai foli edhe për shkaqet që, sipas tij, ndikuan në rezultatin e dobët zgjedhor të LSDM-së, pas shtatë vitesh në pushtet dhe ardhjes në qeverisje me pritshmëri të larta nga qytetarët.

Filipçe tha se partia ka analizuar rezultatet dhe ka konstatuar se kërkesat e qytetarëve janë realizuar vetëm pjesërisht. Përgjegjësinë kryesore për humbjen ai ia atribuoi drejtuesve të Platformës „12.05”, të cilët i konsideroi përgjegjësit kryesorë për politikat dhe vendimet e gabuara të marra gjatë periudhës së kaluar.

“Në vitin 2020 i fituam zgjedhjet, ndërsa në vitin 2021 humbëm me një diferencë minimale. Më pas, në parti u shfaq një grup i vogël njerëzish, i cili në praktikë e mori kontrollin dhe sot qëndron i izoluar në një të ashtuquajtur platformë. Ky grup lejoi miratimin e politikave dhe vendimeve katastrofike.

Ky është grupi që mban përgjegjësi për ndryshimet në Kodin Penal, për propozimin francez, pasojat e të cilit po i përjetojmë sot, si dhe për rritjen e pagave të funksionarëve. Një gjë e tillë nuk duhej të ndodhte në vitet 2023 dhe 2024”, theksoi Filipçe.

Në përfundim, kreu i LSDM-së pranoi se angazhimet e marra ndaj qytetarëve nuk janë realizuar, duke nënvizuar se kjo duhet të shërbejë si një mësim për drejtimin e ri të partisë socialdemokrate.