Filipçe: LSDM do të rikthejë masat konkrete në mbështetje të vreshtarëve

Vreshtarët e Tremnikut të Negotinit i kanë shprehur shqetësimet e tyre për vështirësitë në shitjen e prodhimit gjatë takimit të sotëm me kryetarin e LSDM-së, Venko Filipçe. Sipas tyre, rrushi i zi “Vranec” po mbetet pa blerës dhe po prishet, ndërsa rrushi i bardhë po merret me vetëm 14 denarë për kilogram.

Filipçe deklaroi se një situatë e tillë rrezikon të gjithë punën e bërë gjatë një viti, si dhe paratë e investuara nga vreshtarët. Ai kritikoi Qeverinë, duke thënë se deri tani nuk ka reaguar me masa të përshtatshme për zgjidhjen e këtij problemi.

Kreu i LSDM-së nënvizoi se vështirësitë nuk janë të pranishme vetëm në zonën e Negotinit, pasi edhe prodhuesit e rrushit në pjesë të tjera të vendit po përballen me të njëjtin shqetësim.

“Në kushtet kur qeveria ka 5.5 milionë euro për David Guetta-n, nuk ka para për vreshtarët”, u shpreh Filipçe.

Ai kujtoi gjithashtu periudhën kur LSDM drejtonte vendin, duke theksuar se në atë kohë subvencionet u rritën, pagesat u kryen në afat dhe u aplikuan masa ndërhyrëse sa herë që shfaqeshin probleme me blerjen e rrushit. Filipçe tha se LSDM përsëri do të propozojë masa konkrete për t’i ndihmuar vreshtarët./Telegrafi/