Dy shtetas të Kosovës arrestohen në Shkup, iu sekuestruan rreth 230 mijë euro të dyshuara si të falsifikuara

Dy shtetas të Republikës së Kosovës, të moshave 30 dhe 44 vjeç, janë vënë në pranga në Shkup pasi dyshohen për veprën penale “falsifikim parash”.

Arrestimi i F.R. (30) dhe T.T. (44) u krye më 03.08.2026 nga zyrtarët e Njësisë së Policisë Intervenuese pranë SPB Shkup.

Sipas MPB-së, gjatë kontrollit të automjetit të tipit “Golf”, me të cilin udhëtonin dy personat, u zbuluan kartëmonedha në euro, dollarë amerikanë, franga zvicerane dhe funta britanike, në prerje të ndryshme. Vlera e përgjithshme e parave të gjetura llogaritet në rreth 230 mijë euro.

Shuma është konfiskuar, ndërsa të arrestuarit janë shoqëruar në Stacionin Policor Qendër për veprime të mëtejshme. MPB-ja njoftoi se, pasi çështja të dokumentohet dhe në bashkërendim me prokurorin publik, do të paraqitet kallëzimi përkatës për veprën e parashikuar në nenin 268 të Kodit Penal.