DAP paralajmëron pezullim të përkohshëm të aplikacionit “TVSH-ja Ime” për shkak të një përditësimi teknik

Drejtoria e të Ardhurave Publike (DAP) ka bërë të ditur se aplikacioni “TVSH-ja Ime” do të dalë përkohësisht jashtë funksionit më 23 qershor 2026 (e martë) duke nisur nga ora 12:00, për shkak të aktiviteteve të planifikuara për përmirësimin e infrastrukturës IT të institucionit.

Sipas DAP-it, kjo ndërprerje lidhet me procesin e migrimit të sistemit në një infrastrukturë të re, me synim rritjen e sigurisë dhe garantimin e një disponueshmërie më të madhe të shërbimit.

Autoriteti njofton se sistemi do të rikthehet në funksion sapo të përfundojnë aktivitetet e parashikuara.

Aplikacioni “TVSH-ja Ime” ka për qëllim t’u mundësojë qytetarëve skanimin e faturave fiskale, duke ndihmuar në këtë mënyrë në zvogëlimin e ekonomisë gri.