Cana: Asnjë e dhënë për probleme gastrointestinale nga konsumimi i ujit në Shkup

Klinika Infektive në Shkup nuk ka regjistruar të dhëna për persona që kanë shfaqur shqetësime gastrointestinale si pasojë e konsumimit të ujit të pijshëm në kryeqytet. Këtë e deklaroi sot drejtori i klinikës, doktor Fadil Cana, duke iu përgjigjur interesimit të gazetarëve lidhur me pretendimet e publikuara në rrjetet sociale se uji në Shkup u kishte shkaktuar probleme shëndetësore disa pacientëve.

Cana sqaroi se, në cilësinë e drejtuesit të Klinikës Infektive, mund të konfirmojë se institucioni nuk disponon të dhëna për ndonjë pacient me shqetësime gastrointestinale të lidhura me ujin. Sipas tij, një rast i tillë do të duhej të evidentohej në përputhje me procedurën diagnostikuese.

Ai bëri të ditur se aktualisht është vërejtur një shtim normal i numrit të pacientëve, i cili lidhet me temperaturat e larta. Megjithëse ka rritje, shifrat nuk e tejkalojnë nivelin e zakonshëm të viteve të mëparshme dhe mbeten brenda asaj që pritet në këtë periudhë. Cana ritheksoi se nuk ka të dhëna për shqetësime gastrointestinale të shkaktuara nga pirja e ujit.

Drejtori i Klinikës Infektive i dha këto përgjigje pas konferencës për media në Ministrinë e Shëndetësisë. Gjatë saj, ai raportoi për situatën me ethet e Nilit perëndimor në vend dhe në klinikë, për numrin e personave të prekur, si dhe për rastet me pasqyrë të rëndë klinike.