Bekim Sali takohet në Bratislavë me ministrin sllovak: Mbështetje për integrimin evropian të Maqedonisë së Veriut

Gjatë vizitës në Bratislavë, zv.kryeministri i parë i Maqedonisë së Veriut dhe ministri për Çështje Evropiane, Bekim Sali, zhvilloi një takim me ministrin e Punëve të Jashtme dhe Evropiane të Sllovakisë, Juraj Blanár. Në qendër të bisedës ishte vijimi i procesit të integrimit evropian të vendit dhe hapat që pritet të ndërmerren më tej.

Gjatë takimit, Sali shprehu mirënjohjen për përkrahjen e vazhdueshme që Sllovakia i ka dhënë perspektivës evropiane të Maqedonisë së Veriut. Ai nënvizoi gjithashtu se procesi i zgjerimit duhet të ruajë besueshmërinë, parashikueshmërinë dhe parimin e meritës.

“Përmbushja e detyrimeve të dakorduara duhet të pasohet me progres konkret.”

Diskutimet përfshinë edhe marrëdhëniet e fqinjësisë së mirë dhe çështjet bilaterale mes vendeve. Sipas Salit, këto tema duhet të zgjidhen përmes dialogut dhe respektit të ndërsjellë, ndërsa vëmendja kryesore duhet të mbetet te reformat dhe standardet evropiane.

“Çështjet bilaterale duhet të trajtohen përmes dialogut dhe respektit të ndërsjellë, pa e humbur fokusin e procesit të anëtarësimit nga reformat dhe standardet evropiane.”

Ministri për Çështje Evropiane vlerësoi gjithashtu kontributin e Sllovakisë në mbështetje të zgjerimit të Bashkimit Evropian dhe të perspektivës evropiane të Maqedonisë së Veriut.