Bekim Sali: Me miratimin e ndryshimeve në Statutin e UNT-së, zyrtarizohen tre fakultete të reja

Zëvendëskryeministri i parë, Bekim Sali, bëri të ditur se Kuvendi i Republikës së Maqedonisë së Veriut ka votuar pro ndryshimeve dhe plotësimeve të Statutit të Universitetit “Nënë Tereza” në Shkup, duke hapur rrugën për funksionalizimin dhe zyrtarizimin e tre njësive të reja akademike.

Në një postim publik, Sali e cilësoi këtë zhvillim si një zgjidhje përfundimtare për një çështje që për vite të tëra kishte penguar funksionimin e plotë institucional të universitetit.

Sipas tij, në Kuvend u miratuan ndryshimet dhe plotësimet në Statutin e Universitetit “Nënë Tereza” në Shkup, ndërsa mbështetja për këtë vendim u konfirmua me 59 vota “PËR” dhe pa asnjë votë kundër.

Ai theksoi se këto ndryshime bëjnë të mundur zyrtarizimin dhe funksionalizimin e Fakultetit Juridik, Fakultetit Ekonomik dhe Fakultetit të Shkencave Humane, në përputhje me standardet ligjore dhe me nevojat reale të studentëve.

Sali vlerësoi se ky vendim përfaqëson jo vetëm një arritje institucionale, por edhe një fitore për arsimin e lartë shqip, për studentët dhe për të ardhmen e brezave të rinj.

Ai shtoi se UNT-ja hyn tashmë në një etapë të re zhvillimi, me baza më të forta, më shumë stabilitet dhe një perspektivë më të qartë akademike.

Në fund, Sali nënvizoi se Universiteti “Nënë Tereza” mbetet një shtyllë e rëndësishme e dijes, shkencës dhe përparimit të arsimit në vendin tonë./InfoShqip.com/