Bekim Sali dhe Nicole Varnes riafirmojnë aleancën strategjike mes Maqedonisë së Veriut dhe SHBA-së

Zëvendëskryeministri i parë i Republikës së Maqedonisë së Veriut, Bekim Sali, është takuar me të Ngarkuarën me Punë në Ambasadën e Shteteve të Bashkuara të Amerikës në vend, Nicole Varnes. Në takim u ritheksua partneriteti i fuqishëm strategjik ndërmjet Maqedonisë së Veriut dhe SHBA-së.

Në fokus të bisedës ishin zhvillimet e tanishme, ecuria e reformave, konsolidimi i institucioneve demokratike dhe avancimi i prioriteteve të përbashkëta që paraqesin interes për të dy shtetet.

“Pata kënaqësinë të zhvilloj një takim me të Ngarkuarën me Punë të Ambasadës së Shteteve të Bashkuara të Amerikës në Republikën e Maqedonisë së Veriut, Nicole Varnes. Gjatë takimit rikonfirmuam partneritetin e fortë strategjik ndërmjet dy vendeve tona dhe shkëmbyem mendime për bashkëpunimin në procesin e reformave, forcimin e institucioneve demokratike dhe avancimin e prioriteteve tona të përbashkëta”, deklaroi Sali.

Sipas tij, Qeveria e Republikës së Maqedonisë së Veriut vazhdon të jetë e angazhuar për zgjerimin e marrëdhënieve dhe bashkëpunimit me Shtetet e Bashkuara të Amerikës, të cilat i vlerëson si aleat të rëndësishëm dhe partner të besueshëm.

“Bashkëpunimi me Shtetet e Bashkuara mbetet një shtyllë e rëndësishme e politikës sonë të jashtme dhe do të vazhdojmë të punojmë për forcimin e mëtejshëm të partneritetit tonë strategjik”, u shpreh zëvendëskryeministri i parë Bekim Sali.