Bekim Sali dënon deklaratën e ministres serbe: Gjuhë e papranueshme dhe e rrezikshme

Zëvendëskryeministri i parë dhe ministri i Çështjeve Evropiane, Bekim Sali, ka reaguar ashpër ndaj deklaratës së ministres serbe Snezhana Paunoviq, e cila ka shprehur mbështetje për spastrimin etnik të shqiptarëve të Kosovës. Sali e ka vlerësuar këtë qëndrim si të papranueshëm dhe në kundërshtim me parimet evropiane.

Në reagimin e tij, ai thekson se deklarata e Paunoviq nuk mund të trajtohet si një opinion individual, si retorikë politike apo si interpretim i së shkuarës.

Sipas Salit, spastrimi etnik përbën krim dhe mbetet një prej plagëve më të rënda të historisë së afërt të rajonit. Për këtë arsye, çdo tentativë për ta justifikuar, lavdëruar apo paraqitur si një rast të humbur është, sipas tij, moralisht e papranueshme dhe politikisht e rrezikshme.

Ai nënvizon se Kosova është shtet sovran, demokratik dhe i pavarur, i pranuar nga bota demokratike. Në këtë kuadër, Sali thotë se as deklaratat kërcënuese, as projektet politike dhe as aleancat e vjetra nuk mund të cenojnë lirinë, pavarësinë dhe të drejtën e popullit të Kosovës për të vendosur për të ardhmen e tij.

Duke përmendur Aleksandar Vuçiqin, të cilin e cilëson mik të Ali Ahmetit në projektin “Open Balkan”, Sali deklaron se ai ka ndjekur një qasje politike që është parë si cenim i interesave shtetërore të Kosovës. Ai shton se sot bëhet edhe më e qartë nevoja që Kosova ta mbrojë me vendosmëri sovranitetin e saj dhe të mos lejojë rikthimin e politikave që në të kaluarën kanë prodhuar konflikt, dhunë dhe vuajtje.

Sali vlerëson se deklarata të tilla bien ndesh drejtpërdrejt me vlerat europiane, me respektimin e të drejtave të njeriut dhe me përpjekjet për paqe e stabilitet në rajon.

Sipas tij, e ardhmja e vendeve të Europës Juglindore duhet të mbështetet te aspirata për integrim në BE, drejtësia, respekti i ndërsjellë dhe barazia mes shteteve sovrane, jo te kërcënimet, mohimet dhe nostalgjia për politika që kanë sjellë luftë dhe shkatërrim.