BE-ja dënon nderimet zyrtare për Ratko Mlladiqin në Beograd

Presidenti i Këshillit Evropian, Antonio Costa, dhe Presidentja e Komisionit Evropian, Ursula von der Leyen, kanë reaguar ashpër ndaj glorifikimit të Ratko Mlladiqit gjatë ceremonisë së varrimit të tij në Beograd, ku morën pjesë edhe zyrtarë të lartë serbë.

Në një deklaratë të përbashkët të publikuar të hënën në rrjetin social X, dy përfaqësuesit e lartë të Bashkimit Evropian i cilësuan pamjet nga funerali si “tronditëse”.

Sipas tyre, Mlladiqi ishte një kriminel lufte i dënuar, përgjegjës për gjenocid, krime lufte dhe krime kundër njerëzimit.

Ata theksuan se ish-komandanti serb vdiq gjatë vuajtjes së dënimit me burgim të përjetshëm, të dhënë për gjenocidin në Srebrenicë dhe krime të tjera.

Costa dhe von der Leyen e konsideruan thellësisht të dhimbshëm faktin që varrimi u shoqërua me mbështetje zyrtare dhe me praninë e disa zyrtarëve të lartë serbë.

“Këto pamje tregojnë se nuk është bërë përballja me një kapitull të errët të historisë së afërt të Evropës dhe janë në kundërshtim me vlerat që udhëheqin rrugën e Serbisë drejt Bashkimit Evropian”, thuhet në deklaratën e tyre.

Dy zyrtarët evropianë shprehën gjithashtu solidaritetin e tyre me të gjitha viktimat e krimeve të kryera në territorin e ish-Jugosllavisë.

Për pamjet e ceremonisë foli edhe Paula Pinho, zëdhënësja kryesore e Presidentes së Komisionit Evropian, Ursula von der Leyen.

“Pas informimit tonë të mesditës dje, pamjet nga funerali folën më shumë se një milion fjalë”, deklaroi ajo.