BDI: Pretendimi për shkrirjen e VLEN-it është propagandë, Alternativa ende figuron si subjekt më vete

Bashkimi Demokratik për Integrim ka reaguar sërish ndaj koalicionit VLEN, duke deklaruar se Alternativa vazhdon të jetë e regjistruar si parti e veçantë në Regjistrin Qendror. Sipas BDI-së, në dokumentet zyrtare kryetar i kësaj partie figuron Zekirija Berisha.

BDI pretendon se Berisha, i cili aktualisht mban postin e shefit të kabinetit të ministrit Bekim Sali, është regjistruar në këtë detyrë pa u bërë publik ndryshimi dhe pa u njoftuar anëtarësia e Alternativës.

“Dokumentet zbulojnë edhe një skandal tjetër: drejtuesit e Alternativës e kanë zëvendësuar kryetarin e partisë pa e informuar as anëtarësinë dhe as opinionin publik”, thuhet në reagimin e BDI-së.

Partia e Ali Ahmetit kërkon sqarime për rrethanat e këtij ndryshimi, duke pyetur se kur është zgjedhur Zekirija Berisha, cili organ i partisë e ka miratuar vendimin, përse ai është mbajtur i fshehtë dhe nëse anëtarët e Alternativës janë në dijeni se kush e drejton juridikisht subjektin e tyre.

Sipas BDI-së, bëhet fjalë për një situatë “skandaloze dhe me gjasë të paprecedentë”, pasi kryetari i një partie është ndryshuar në dokumentet zyrtare, ndërsa publiku nuk është informuar për këtë fakt.

Në reagimin e saj, BDI e lidh rastin me deklaratat për bashkimin e partive shqiptare brenda VLEN-it. Ajo pretendon se kjo “shkrirje” nuk pasqyrohet në statusin juridik të partive. “BESA vazhdon të ekzistojë me Bilall Kasamin kryetar. Alternativa vazhdon të ekzistojë me Zekirija Berishën kryetar. Të ashtuquajturën ‘shkrirje’ e kanë vetëm për konferenca dhe propagandë”, thuhet në kumtesë.

BDI e mbyll reagimin duke akuzuar VLEN-in se “partitë, kryetarët, vulat dhe interesat vazhdojnë veçmas”, ndërsa pretendimin për bashkim e cilëson si “mashtrim nga themeli deri në majë”.