AUV Maqedoni hedh poshtë pretendimet: Uji i ujësjellësit të Shkupit është i pijshëm

Agjencia e Ushqimit dhe Veterinarisë (AUV) ka mohuar kategorikisht informacionet e përhapura në publik, sipas të cilave uji i sistemit të furnizimit në Shkup nuk është i sigurt për konsum për shkak të pranisë së pretenduar të bakterit Escherichia coli.

AUV sqaron se, si institucioni përgjegjës, deri më tani nuk ka marrë nga ndërmarrja publike e shërbimeve të Shkupit asnjë njoftim për rezultate të papranueshme nga analizat laboratorike të ujit të pijshëm. Institucioni thekson se raportimi i një rezultati të tillë përbën detyrim ligjor dhe do të shërbente si bazë për vendosjen e ndalimit të përdorimit të ujit.

Agjencia u bëri thirrje qytetarëve të mos shqetësohen, duke garantuar se uji që vjen nga ujësjellësi i qytetit të Shkupit mund të pihet dhe të përdoret pa rrezik./Telegrafi/