Andonovski: Gurthemeli i qendrës kombëtare të të dhënave synohet të vendoset në vitin 2027

Qendra kombëtare e të dhënave mund të nisë të ndërtohet në vitin 2027, nëse procedurat përfundojnë sipas planifikimit. Këtë e bëri të ditur ministri i Transformimit Dixhital, Stefan Andonovski, në një intervistë për televizionin Sitel.

Sipas Andonovskit, lokacioni është përcaktuar pranë Shkupit, ndërsa Ministria e Transportit po përgatit dokumentacionin e nevojshëm të planifikimit urban.

Për financimin e projektit, i cili përfshihet në Axhendën e Reformës dhe Planin e Rritjes, po zhvillohen bisedime me huadhënës të mundshëm dhe partnerë ndërkombëtarë. Plani parashikon që 30 përqind e financimit të vijë nga një grant.

Ministria po zhvillon kontakte edhe me investitorë të interesuar për ngritjen e qendrave private të të dhënave. Andonovski nënvizoi se nuk do të mbështeten iniciativa që mund të dëmtojnë mjedisin.

“Projekti po përparon dhe të gjithë hapat po ndiqen siç duhet. Jam i sigurt se në vitin 2027 do të mund ta vendosim gurthemelin”, u shpreh ai.

Ministri njoftoi gjithashtu se Strategjia Kombëtare për Përdorimin e Inteligjencës Artificiale është publikuar dhe ndodhet në fazën e konsultimeve. Miratimi i ligjit për inteligjencën artificiale është parashikuar për vitin e ardhshëm./Telegrafi/