Aksion policor në lokalet e Shkupit, ndalohen tetë persona

Tetë persona, përfshirë edhe tre të mitur, janë privuar nga liria pas kontrolleve të zhvilluara gjatë natës në disa lokale hotelierike në Shkup.

Operacioni u realizua nga Sektori për Punë të Brendshme në Shkup, në bashkëpunim me inspektorë të Inspektoratit Shtetëror të Tregut.

Gjatë kontrolleve u identifikuan gjithsej 37 persona. Në dy lokale u konstatua se aktiviteti vijonte pas përfundimit të orarit të lejuar, ndërsa në një lokal tjetër ishte shërbyer alkool për persona të mitur.

Autoritetet evidentuan gjithashtu persona që dyshohet se kishin në posedim drogë narkotike, substanca psikotrope dhe prekursorë.

“Sektori për Punë të Brendshme në Shkup, në bashkëpunim me inspektorë të Inspektoratit Shtetëror të Tregut, gjatë natës ka kryer kontrolle në disa lokale hotelierike në Shkup. Gjatë kontrollit janë identifikuar 37 persona, ndërsa tetë persona janë privuar nga liria, prej të cilëve tre janë të mitur. Në dy lokale është konstatuar tejkalim i orarit të punës, ndërsa në një lokal është konstatuar shërbim i alkoolit ndaj personave të mitur. Gjithashtu, janë konstatuar persona që posedonin drogë narkotike, substanca psikotrope dhe prekursorë“, thonë nga MPB.