Ahmeti kërkon zgjedhje të parakohshme: Janë alternativa më e mirë dhe priten vitin e ardhshëm

Kreu i BDI-së, Ali Ahmeti, deklaroi në emisionin Click Plsu në RTV21 se zgjedhjet e parakohshme përbëjnë zgjidhjen më të mirë për vendin, raporton TV21. Sipas tij, nevojitet krijimi i një klime të re, ndërsa gjendja në vend nuk duhet lejuar të përkeqësohet më tej.

Ahmeti sqaroi se mbajtja e zgjedhjeve të parakohshme nuk parashikohet gjatë këtij viti, por vitin e ardhshëm. Ai theksoi se BDI-ja është e përgatitur për zgjedhje në çfarëdo kohe që ato mund të organizohen, madje edhe nëse do të zhvilloheshin nesër.

Sipas Ahmetit, ndryshimi i klimës është i domosdoshëm dhe, siç vlerësoi ai, edhe partia maqedonase që përbën shumicën e ka kuptuar se situata nuk po ecën mirë. Ai kërkoi kujdes gjatë përzgjedhjes, si dhe respektim të shumicës së shqiptarëve, duke përsëritur se rruga më e përshtatshme do të ishin zgjedhjet e parakohshme.

Duke folur për përfshirjen e VLEN-it në Qeveri, lideri i BDI-së e kritikoi këtë vendim, pasi, sipas tij, hyrja është bërë pa legjitimitet. Ahmeti u shpreh se ky duhet të jetë rasti i fundit kur partitë shqiptare bëhen pjesë e Qeverisë pa pasur legjitimitet, ndërsa për VLEN-in tha se e ka shitur lëkurën shumë lirë.

Mes të tjerash, Ahmeti kujtoi se BDI-ja ka qeverisur për një dekadë me VMRO-në dhe për një dekadë me LSDM-në, por nënvizoi se asnjëherë nuk është futur në Qeveri pa marrëveshje.