Afrim Gashi: Maqedonia e Veriut dëshmon se bashkëjetesa është vlerë shoqërore

Kryetari i Kuvendit, Afrim Gashi, mori pjesë në konferencën e zhvilluar në Kajro me organizim të Ligës së Shteteve Arabe, ku përfaqësoi Republikën e Maqedonisë së Veriut si folës kryesor.

Gjatë fjalës së tij, ai prezantoi përvojën e vendit në bashkëjetesën etnike, kulturore dhe ndërfetare, duke nënvizuar rolin e dialogut, tolerancës dhe respektit reciprok në forcimin e shoqërisë.

“Ishte nder për mua që në Kajro të përfaqësoja Republikën e Maqedonisë së Veriut si folës kryesor në Konferencën e organizuar nga Liga e Shteteve Arabe.

Në fjalimin tim solla përvojën e vendit tonë si dëshmi të bashkëjetesës etnike, kulturore e ndërfetare. Theksova gjithashtu se diversiteti nuk duhet parë si shkak për përçarje, por si një pasuri që e bën shoqërinë më të fortë.

Përcolla qëndrimin se përballja me çdo formë diskriminimi dhe me gjuhën e urrejtjes përbën në të njëjtën kohë mbrojtje të dinjitetit njerëzor, lirisë së besimit dhe parimeve demokratike. Dialogu, toleranca dhe respekti reciprok mbeten rruga e vetme drejt ndërtimit të paqes dhe mirëkuptimit mes njerëzve”, ka deklaruar kryetari i Kuvendit, Afrim Gashi.