17 ditët vendimtare për Artan Grubin – nëse prokurori nuk vepron, ai lirohet edhe nga arresti shtëpiak

Më 22 gusht skadon afati gjashtëmujor i hetimeve ndaj ish-zëvendëskryeministrit nga radhët e BDI-së, Artan Grubi. Nëse deri atëherë prokurori nuk ngre aktakuzë, atij do t’i hiqet edhe masa e arrestit shtëpiak.

Prokurori i Prokurorisë Themelore Publike në Shkup, i cili pas 14 muajsh arrati e mbajti Grubin në paraburgim vetëm gjysmë dite dhe menjëherë ia zbuti masën, ka edhe 17 ditë kohë ligjore për të finalizuar hetimin. Në të kundërt, i dyshuari do të jetë plotësisht i lirë.

“Në mungesë të aktakuzës, arresti shtëpiak për të dyshuarin në fjalë hiqet dhe Gjykata Themelore Penale Shkup, me detyrë zyrtare, vendos një masë për të garantuar praninë e tij. Zakonisht kjo nënkupton konfiskimin e dokumentit të udhëtimit,” sqarojnë për Sakamdakazam.mk nga Gjykata Penale.

Grubi iu dorëzua autoriteteve në pikën kufitare të Bllacës më 23 shkurt 2026, pas një periudhe të gjatë qëndrimi në Kosovë, ku për të kaluar kufirin nuk kërkohet pasaportë – mjafton vetëm letërnjoftimi.

Ai dyshohet për përvetësimin e 8,2 milionë eurove në Lotarinë Shtetërore. Vetëm pak orë pasi u fut në paraburgim, deklaroi se ndihej i pasigurt në burgun e Shutkës, çka bëri që prokurori, zyrtarë të Agjencisë për Siguri Kombëtare (ASK) dhe të Ministrisë së Brendshme, së bashku me gjyqtarin e procedurës paraprake, ta nxirrnin menjëherë nga qelia dhe të propozonin masën e arrestit shtëpiak.

Më 24 nëntor 2025, ish-prokurori i shtetit, Ljupço Kocevski, kishte pohuar se provat për Grubin ishin siguruar dhe se pritej vetëm ekstradimi i tij nga Kosova. Heshtja që mbizotëron mbi këtë dosje mbetet e pashpjegueshme. Edhe gjatë ditës së djeshme, Prokuroria u përgjigj se nuk kishte asnjë risi në hetim që mund të bëhej publike.

Krahas Grubit, në këtë çështje penale është i përfshirë edhe Prparim Bajrami, drejtori i përgjithshëm dhe kryetar i Bordit Drejtues të Lotarisë Shtetërore, i cili gjithashtu ndodhet në arrati.

Katër persona të tjerë janë nën hetim si kryetarë dhe anëtarë të komisioneve për dy njoftime të ndryshme publike. Ata dyshohet se kanë shpërdoruar autoritetin dhe detyrat e veçanta, duke zhvilluar procedura publike për kalimin e licencave të lojërave elektronike dhe online të fatit, edhe pse e dinin se këto procedura nuk duhej të zbatoheshin në rastet konkrete.