U largua nga puna pas natës në saunë, tani kërkon deri në 76 milionë £ dëmshpërblim

Shannon Burns, ish-drejtuese e lartë e teknologjisë, ka fituar të drejtën të kërkojë deri në 76 milionë £ kompensim. Ajo fitoi çështjen për diskriminim për shkak të aftësisë së kufizuar kundër Gitpod, kompani që së fundmi u ble nga OpenAI.

Burns, e cila ishte zëvendëspresidente e Inxhinierisë dhe paguhej rreth 220,000 £ në vit, u pushua nga puna në vitin 2023. Gjatë një udhëtimi pune në Austri, ajo harroi çelësin e dhomës për shkak të ADHD-së dhe përfundoi duke kaluar natën në një sauna, transmeton Klankosova.tv.

Tribunali i Punës në Birmingham kishte vendosur vitin e kaluar se largimi i saj nga puna lidhej me aftësinë e kufizuar. Tashmë, gjykata ka refuzuar kërkesën e Gitpod për ta kufizuar kompensimin në 1 milion £, duke i mundësuar Burns të kërkojë zyrtarisht 76,071,992 £.

Ajo pretendon se pasojat për karrierën e saj të ardhshme janë të konsiderueshme, pasi diskriminimi dhe pushimi nga puna, sipas saj, i kanë shkaktuar dëme të mëdha në industrinë e teknologjisë.

Gjithashtu, gjykata ka urdhëruar Gitpod të bëjë të ditur vlerën e shitjes së kompanisë te OpenAI, duke qenë se Burns zotëron aksione në të.