Studimet tregojnë se lidhja mes motrave ofron ngrohtësinë më të madhe dhe pakëson ndjenjën e vetmisë

Një hulumtim i kryer me pjesëmarrjen e më shumë se 600 personave të rritur ka nxjerrë në pah se marrëdhëniet motër-motër dallohen për ngrohtësinë më të theksuar në krahasim me çiftet e tjera vëllazërore. Sipas të dhënave, këto lidhje të forta shoqërohen me nivele më të ulëta të vetmisë dhe një mirëqenie psikologjike më të lartë.

Një tjetër studim, i botuar në revistën Journal of Relationships Research, evidenton se raportet mes motrave dhe vëllezërve, sidomos kur mbështeten te besimi dhe afërsia emocionale, radhiten ndër marrëdhëniet më të qëndrueshme në çdo fazë të jetës. Studiuesit kanë vënë re se ndikimi i lidhjes me motrën rrit bashkëpunimin dhe zvogëlon konfliktet, pavarësisht nga ndikimi i prindërve apo i miqve.

Ekspertët argumentojnë se kjo vjen si rezultat i komunikimit të shpeshtë që mbajnë motrat me njëra-tjetrën, si dhe i prirjes për të ndarë përjetime personale dhe për të ofruar mbështetje emocionale gjatë gjithë ciklit jetësor, nga fëmijëria deri në moshën e tretë. Ata saktësojnë megjithatë se lloji i marrëdhënies ndikohet nga dinamikat brenda familjes, përvojat e përbashkëta dhe mënyra sesi është kultivuar raporti me kalimin e kohës.

Konkluzionet e studimeve përforcojnë bindjen se, nëse ndërtohet mbi themelet e besimit, respektit dhe dialogut të vazhdueshëm, marrëdhënia mes motrave mund të shndërrohet në një prej shtyllave më jetëgjata dhe më mbështetëse në ekzistencën e një individi.