Shkrimtari nga Kosova, Lan Qyqalla, shpërblehet në festivalin ndërkombëtar “Çfarë nuk di Kaini” në Itali dhe ia kushton suksesin mbesës së tij

Një vlerësim prestigjioz letrar i është dhënë autorit shqiptar nga Fushë Kosova, Lan Qyqalla, i cili siguroi vendin e dytë në edicionin e shtatë të Çmimit Ndërkombëtar për Letërsi dhe Arte Pamore “Ciò che Caino non sa” (“Çfarë nuk di Kaini”), që u organizua në Itali. Tregimi që e ngjiti në podium, “Gruaja që nuk pranoi të heshtë”, u dallua mes dhjetëra krijimeve të tjera.

Ngjarja kulturore mblodhi një gamë të gjerë artistësh dhe intelektualësh nga e gjithë bota, përfshirë shkrimtarë, piktorë, filozofë, kompozitorë, muzikantë, gazetarë, psikologë dhe fotografë. Në kategorinë e prozës për autorët që nuk banojnë në Itali, Qyqalla u radhit menjëherë pas fituesit nga Panamaja dhe përpara një konkurenteje greke.

Ceremonia e ndarjes së çmimeve u zhvillua në qytetin e Fogias, me pjesëmarrjen e figurave të shquara nga fushat e artit, kulturës, letërsisë, shkencës dhe filozofisë. Mes të pranishmëve gjendeshin edhe përfaqësues të Universitetit të Barit, anëtarë të jurisë, personalitete institucionale si dhe organizatorja kryesore e veprimtarisë, Maria Teresa Infante La Marca.

Brenda një amfiteatri të mbushur plot, u nderuan krijuesit më të spikatur në disiplina të ndryshme artistike, letrare dhe kulturore. Një moment i dedikuar i mbrëmjes i rezervohet shkrimtarit kosovar, i cili prezantoi dimensionet ideo-artistike të veprës së vlerësuar. Rrëfimi i tij prek një problematikë delikate dhe tejet bashkëkohore, duke u harmonizuar plotësisht me misionin e këtij çmimi ndërkombëtar, që synon rritjen e ndërgjegjësimit kundër dhunës me bazë gjinore dhe asaj ndaj të miturve.

Ky arritje shënon një tjetër sukses domethënës për letërsinë shqipe dhe përfaqëson një zhvillim inkurajues për skenën kulturore të Kosovës, veçanërisht për qytetin e Fushë Kosovës, prej nga vjen autori. Gjithashtu, në mesin e të nderuarve u përfshi edhe poeti shqiptar Nikollë Loka, të cilit iu akordua Çmimi i Ekselencës për poezinë.

Pasi mori vlerësimin në dorë, Qyqalla falënderoi Akademinë e Arteve dhe Shkencave Filozofike të Barit dhe të gjithë organizatorët e festivalit, duke përshëndetur njëkohësisht edhe laureatët e tjerë të pranishëm në këtë manifestim artistik e kulturor.

“Këtë çmim të dytë, të fituar në një garë ndërkombëtare ku morën pjesë autorë nga shumë shtete, ia dedikoj mbesës sime të shtrenjtë Arila, e cila është vetëm tre vjeçe. Shpresoj thellësisht që ajo, përmes talentit, përkushtimit dhe ëndrrave që ushqen, të shkojë edhe më larg se gjyshi i saj dhe një ditë të nderohet me Çmimin Nobel, qoftë në letërsi, shkencë apo inovacion,” u shpreh Qyqalla.