Fistekët dhe ndikimi i tyre në shëndetin e zemrës, tretjes dhe trurit

Fistekët njihen për përmbajtjen e tyre të fibrave, proteinave, yndyrave të dobishme, vitaminave, mineraleve dhe antioksidantëve. Sipas Health.com, përfshirja e tyre e rregullt në ushqyerje mund të mbështesë shëndetin e zemrës dhe sistemit tretës, si edhe të ndihmojë në ruajtjen e niveleve të qëndrueshme të sheqerit në gjak.

Ndikimi i fistekëve në tretje lidhet me praninë e fibrave të tretshme dhe të patretshme. Fibrat e patretshme ndihmojnë në rregullsinë e jashtëqitjes, ndërsa ato të tretshmet shërbejnë si ushqim për bakteret e dobishme të zorrëve. Gjatë përpunimit të fibrave, këto baktere prodhojnë acide yndyrore me zinxhir të shkurtër, mes tyre edhe butiratin, i cili luan rol në shëndetin e qelizave të zorrës së trashë dhe në funksionimin normal të aparatit tretës.

Në përgjithësi, një regjim ushqimor me shumë fibra lidhet me mundësi më të ulëta për kapsllëk dhe për shfaqjen e disa problemeve të sistemit tretës.

Fistikët mund të jenë pjesë e një ushqyerjeje që i bën mirë zemrës, pasi furnizojnë organizmin me kalium, fibra dhe yndyra të pangopura. Kaliumi kontribuon në kontrollin e presionit të gjakut, ndërsa fibrat dhe yndyrnat e pangopura mund të ndihmojnë në mbajtjen e vlerave të shëndetshme të lipideve në gjak.

Rezultatet e studimeve sugjerojnë se konsumimi i rregullt i fistikëve mund të ndikojë pozitivisht te presioni i gjakut dhe kolesteroli. Një analizë e 34 studimeve arriti në përfundimin se dietat ku përfshihen fistikët shoqërohen me ulje të kolesterolit total, kolesterolit LDL dhe triglicerideve. Për më tepër, ndërthurja e proteinave, fibrave dhe yndyrave i bën ata një ushqim që ngop, duke ndihmuar në kontrollin e oreksit dhe ruajtjen e një peshe të shëndetshme, transmeton Klankosova.tv.

Ngjyrat jeshile dhe vjollcë të fistekëve vijnë nga pigmentet bimore dhe antioksidantët që përmbajnë. Në veçanti, ata janë të pasur me luteinë dhe zeaksantinë, dy karotenoide që mund të mbrojnë qelizat nga dëmtimet e shkaktuara prej stresit oksidativ.

Përbërja e tyre përfshin edhe antioksidantë të tjerë, si flavonoidet, komponimet fenolike dhe vitaminën E. Kjo larmi ushqyese i bën fistikët një zgjedhje të vlefshme për një dietë të bazuar te ushqimet bimore.

Luteina dhe zeaksantina, të pranishme te fistikët, po shqyrtohen edhe për rolin e tyre të mundshëm në mbështetjen e shëndetit të trurit. Këto përbërës gjenden gjithashtu në indet e trurit.

Marrja më e lartë e karotenoideve përmes ushqimit është lidhur me kujtesë më të mirë dhe me përmirësim të aftësive të tjera njohëse. Megjithatë, asnjë ushqim i vetëm nuk mund të parandalojë rënien e aftësive njohëse, pasi rëndësi ka mënyra e përgjithshme e të ushqyerit dhe stili i jetesës.

Kombinimi i proteinave, fibrave dhe yndyrave te fistikët mund të ngadalësojë rritjen e sheqerit në gjak pas konsumimit të një vakti. Një përmbledhje e gjashtë studimeve tregoi se te personat me diabet të tipit 2, konsumimi i fistikëve shoqërohej me nivele më të ulëta të sheqerit në gjak në esëll dhe me rezistencë më të vogël ndaj insulinës.

Kjo nuk nënkupton se fistikët e kurojnë diabetin. Ata mund të përfshihen në një ushqyerje të ekuilibruar, të përshtatur për personat që duhet të mbajnë nën kontroll nivelin e sheqerit në gjak.

Një porcion prej rreth 28 gramësh, që përkon me një grusht të vogël fistikësh, ka afërsisht 160 kalori, gjashtë gramë proteina, tre gramë fibra dhe 13 gramë yndyrë.

Përveçse janë burim i mirë i vitaminës B6 dhe bakrit, fistekët përmbajnë edhe kalium, fosfor, hekur, mangan, zink dhe vitaminë E. Vitamina B6 nevojitet për punën normale të sistemit nervor dhe imunitar, ndërsa bakri merr pjesë në disa procese të rëndësishme të organizmit, përfshirë prodhimin e energjisë.