Pse veshjet e lehta janë më të përshtatshme se gjumi pa rroba gjatë verës?

Në netët kur temperaturat mbeten të larta, heqja e rrobave para gjumit mund të duket si zgjidhja më e thjeshtë për t’u freskuar.

Por Julius Patrick, specialist i fiziologjisë së gjumit, thotë se zgjedhja e veshjeve të lehta mund të jetë më e dobishme.

Sipas Patrick, ndonëse gjumi lakuriq mund të duket tërheqës në vapë, ai mund ta përkeqësojë cilësinë e pushimit, pasi djersa qëndron mbi lëkurë. Për këtë arsye, ai këshillon përdorimin e rrobave të holla gjatë natës, të cilat e përthithin djersën dhe mund ta freskojnë trupin në mënyrë më efikase.

Duhet pasur parasysh gjithashtu se temperatura e trupit ulet natyrshëm gjatë natës. Si rrjedhojë, ajo që duket e rehatshme kur bini në gjumë mund t’ju bëjë të ndiheni tepër ftohtë më vonë.

Si ta bëni më të lehtë gjumin në mot të nxehtë

Fillimisht, përpiquni të mos lejoni që dhoma e gjumit të nxehet shumë gjatë ditës. Kur jashtë është më ngrohtë, këshillohet t’i mbani perdet të mbyllura ose grilat të ulura. Në mbrëmje, nëse ajri i jashtëm është më i freskët se ai brenda, hapini dritaret dhe krijoni qarkullim ajri. Në këtë mënyrë, dhoma mund të freskohet para se të shkoni në shtrat, transmeton Klankosova.tv.

Nuk është e nevojshme t’i largoni të gjithë çarçafët. Patrick sugjeron të mbani pranë një çarçaf të hollë pambuku, sepse ky material mund ta përthithë djersën. Gjatë netëve të nxehta nuk ju duhet një jorgan i trashë, ndërsa një çarçaf i lehtë mund të rezultojë i dobishëm.

Edhe një dush mund t’ju vijë në ndihmë

Një tjetër këshillë e Patrick është të bëni një dush të shpejtë përpara se të flini. Uji nuk ka pse të jetë patjetër i ftohtë, pasi disa persona mund të ndihen më rehat me një dush ose vaskë të ngrohtë. Ai shpjegon se një dush i ngrohtë mund të ndikojë në uljen e temperaturës së trupit, duke e bërë më të lehtë rënien në gjumë dhe vazhdimin e tij për një kohë më të gjatë.

Prandaj, kur vapa ju shqetëson gjatë natës, gjumi pa rroba nuk është alternativa e vetme. Një dhomë e freskët, veshjet e holla, çarçafët e ajrosur prej pambuku dhe një dush para gjumit janë masa të thjeshta që mund t’ju ndihmojnë ta përballoni nxehtësinë, transmeton Klankosova.tv.