Mjekja: Ushqyerja me gji ul riskun për t’u prekur nga kanceri i gjirit

Një panel udhëheqës shëndetësorë kanë rekomanduar së fundmi se mosha në të cilën gratë kontrollohen rregullisht për kancerin e gjirit duhet të ulet nga 50 në 40

Onkologia Kleida Mati tha në emisionin GoodMorning Albanians në Euronews Albania se kanceri i gjirit është një sëmundje multifaktoriale ku ndikon gjenetika dhe stili i jetesës.

Ajo u shpreh se stili i jetesës ndikon shumë në predispozitën për t’u prekur nga kanceri i gjirit.

Një nga faktorët që e ul riskun për t’u prekur nga kjo sëmundje te gratë është ushqyerja me gji, nënvijëzoi onkologia.

“Ka disa faktorë që nuk mund t’i modifikojmë siç është gjenetika. Por ka faktorë të tjerë që i kemi në dorë siç është stili i jetesës; gratë duhet të jenë sa më shumë aktive, të mos pinë alkool, ushqyerja me gji është shumë e rëndësishme, faktorët e një jete të shëndetshme ndikojnë pozitivisht. Kanceri është një sëmundje multifaktoriale, secili ndikon nga pak. Ushqyerja me gji ndihmon në uljen e riskut për zhvillimin e kancerit të gjirit”, tha mjekja.