Departamenti amerikan i Thesarit pritet të vendosë sanksione shtesë ndaj Wagner-it, që ka ndihmuar ushtrinë ruse në luftën kundër Ukrainës.

Zëdhënësi i Këshillit të Sigurisë Kombëtare të SHBA-së, John Kirby, tha më 20 janar se Thesari do ta cilësojë Wagner-in në ditët në vijim si një organizatë të rëndësishme të krimit transnacional.

Radio Evropa e Lirë në këtë artikull pasqyron atë që dihet deri tani lidhur me këtë kompani.

Çfarë është Wagner?

Wagner, i cilësuar shpesh si një ushtri mercenare, është themeluar në vitin 2014 nga shtetasi rus, Yevgeny Prigozhin, i cili është person i afërt me Kremlinin. Vitin e themelimit të kësaj ushtrie private, Rusia aneksoi gadishullin ukrainas të Krimesë.

Kompania është akuzuar për krime të mundshme lufte në Ukrainë, Siri dhe vende të ndryshme afrikane.

Njësia është nën sanksionet e Bashkimit Evropian (BE) që nga dhjetori i vitit 2021 për shkelje të të drejtave të njeriut në konfliktet e armatosura në mbarë botën.

Wagner ka qenë, gjithashtu, në listën e zezë të SHBA-së që nga qershori i vitit 2017, për shkak të përfshirjes në konfliktet në lindje të Ukrainës.

Agjencia e lajmeve Reuters raportoi se më 4 nëntor, grupi Wagner hapi një qendër të teknologjisë ushtarake në Shën Petersburg, Rusi, me qëllim të tërheqjes së bizneseve të reja dhe kompanive që merren me teknologjinë industriale “me ide të reja që janë gati për t’u aplikuar në sferën e mbrojtjes kombëtare”.

Në hapje ishin të pranishëm veteranë ushtarakë dhe ekspertë të IT-së, siç raporton Reuters, dhe një kamion i parkuar para qendrës e kishte të shënuar shkronjën “Z” – një nga simbolet e pushtimit rus të Ukrainës.

Lidhjet me të djathtët në Serbi

Në nëntor të vitit 2022, Damjan Knezheviq, udhëheqësi i organizatës së krahut të djathtë “Patrulla Popullore” nga Serbia, vizitoi Qendrën e Teknologjisë Ushtarake Wagner në Rusi.

Knezheviq thuhet se ka deklaruar në një prononcim për mediat ruse se “shumë nga miqtë e mi do të jenë krenarë që kam pasur nderin të vizitoj Qendrën Wagner”. Por, kur u pyet nga Radio Evropa e Lirë për lidhjet e tij me këtë kompani ushtarake, Knezheviq mohoi çdo lidhje.

Megjithatë, ai përmendi se i njihte “disa serbë që ishin atje”.

Organizata “Patrullat Popullore”, të cilën e drejton Knezheviq, njihet për aksionet kundër emigrantëve dhe organizimin e protestave në mbështetje të Rusisë në Beograd, pas pushtimit të Ukrainës nga Kremlini.

Muralet mbështetëse

Më 18 janar, një mural kushtuar ndërmarrjes ushtarake private ruse, Wagner, me organizatën ultra të djathtë “Patrullat Popullore” në sfond, në qendër të qytetit të Beogradit u ngjyros sërish.

“Patrullat Popullore” edhe më parë ishin shprehur për Wagner-in në profilin e tyre Telegram.

Murali kushtuar Wagner-it në qendër të Beogradit u restaurua tri ditë pasi u pikturua, më 18 janar 2023.

Murali fillimisht u pa më 14 janar, por u mbulua me ngjyrë ditën tjetër.

Aktivistët e organizatës joformale “Rusët, ukrainasit, bjellorusët dhe serbët kundër luftës” e dënuan muralin në një postim në Twitter, duke kritikuar regjimin e Vladimir Putinit nga Serbia.

Një tjetër mural kushtuar Wagner-it ishte shfaqur edhe më parë, në vitin 2021, në Beogradin e Ri, i organizuar nga lideri i partisë joparlamentare “E Djathta Serbe” Misha Vaciq.

Simboli i rilngjyrosur i formacionit rus Wagner në Beograd, 16 janar 2023.

Që nga fillimi i agresionit rus ndaj Ukrainës, organizatat e krahut të djathtë në Serbi kanë qenë të zëshme në mbështetjen e tyre ndaj politikës së Kremlinit dhe kundërshtimit të vendosjes së sanksioneve kundër Rusisë.

Pavarësisht se është kandidate për anëtarësim në BE, Serbia ka refuzuar të vendosë sanksione ndaj Kremlinit.

Reklamimi në Russia Today

Në janar, agjencia ruse e lajmeve, Russia Today Balkan (RT), publikoi një reklamë nga grupi Wagner që kërkonte vullnetarë për grupin. Reklama detajon kushtet për pjesëmarrje, fitime dhe trajnime.

Megjithatë, njoftimi u ndryshua më vonë, duke përshkruar një grup ish të burgosurish që ishin vullnetarë për një operacion ushtarak në anën e Rusisë.

Versioni origjinal i lajmit mund të gjendet në Google.

I pyetur për këtë reklamë, ministri i Jashtëm serb, Ivica Daçiq, tha se nuk kishte dëgjuar për të dhe se Serbia i ndëshkon ata që marrin pjesë në luftëra jashtë vendit.

Ambasada e Ukrainës në Beograd, gjithashtu, lëshoi një deklaratë ku dënon reklamën dhe i bën thirrje Serbisë që të marrë masa për të ndaluar propagandën ruse dhe thirrjet për vullnetarë përmes reklamave, si dhe të ndalojë aktivitetet e RT-së në Serbi.

Kjo agjenci e lajmeve, e kontrolluar nga shteti rus, së cilës i është ndaluar transmetimi në Bashkimin Evropian që nga marsi i vitit 2022, filloi të funksionojë në Serbi më 15 nëntor.

Edhe presidenti i Serbisë e dënoi reklamën duke thënë “Çfarë po i bëni Serbisë, pse po bëni thirrje nga Serbia, kur e dini se kjo është në kundërshtim me ligjet tona” dhe u bëri thirrje “miqve rusë” të mos e vendosin Serbinë padrejtësisht në vështirësi.

Ligjet serbe për ata që u bashkohen luftërave të huaja

Pjesëmarrja dhe organizimi i pjesëmarrjes në një luftë në një vend të huaj është vepër penale në Serbi që nga viti 2014, e dënueshme deri me 10 vjet burgim.

Në mesin e 32 aktgjykimeve që Serbia ka dhënë kundër luftëtarëve në pjesët e pushtuara të Ukrainës, në njërin nga marsi i vitit 2017, një shtetas i Serbisë është dënuar për luftime në Ukrainë në krah të separatistëve pro-rusë brenda grupit Wagner.

Me aktgjykim të Gjykatës së Lartë të datës 10 mars 2017, shtetasi i Serbisë është dënuar me burgim me kusht për një vit.

Dënimi me kusht do të thotë se i dënuari nuk e ka vuajtur dënimin në burgim, por është liruar. Mirëpo, nëse i dënuari kryen ndonjë vepër tjetër penale brenda tre vjetëve të ardhshëm nga shpallja e aktgjykimit, në atë rast ai do të arrestohej dhe do të dënohej me burgim për një vit.

Sipas aktgjykimit, i pandehuri “me vetëdije dhe vullnetarisht ka pranuar kryerjen e krimit”.

Në dokument, megjithatë, gjykata fshehu identitetin e të dënuarit duke errësuar të gjitha detajet – nga emri dhe mbiemri, viti i lindjes dhe adresa e banimit.

Vendimi, siç u tha, u dha në bazë të marrëveshjes për pranimin e fajësisë.

Shtetasi serb, Dimitrije Sasha Jojiq, i cili vdiq në luftën në Siri në qershor të vitit 2017 duke luftuar në krah të forcave të presidentit sirian, Bashar al-Assad, përmendet në mesin e anëtarëve të grupit Wagner në mediat në Serbi.

Para Sirisë, Jojiq luftoi në Ukrainë.

Nuk ka asnjë informacion të konfirmuar nëse luftëtarë të rinj nga Serbia iu bashkuan Wagner-it pas pushtimit të Ukrainës.

Videot dhe fotot e pakta të disponueshme deri më tani, të publikuara në rrjetet sociale, dyshohet se tregojnë luftëtarë serbë në njësitë ruse.

Autoritetet në Serbi thanë se janë duke i hetuar rastet, por nuk e shpallën publikisht numrin e tyre.

Shqetësime për përpjekjet e Wagnerit për të rekrutuar ushtarë në Serbi dhe vende të tjera, gjatë vizitës së tij në Serbi, ka shprehur këshilltari special i Departamentit Amerikan të Shtetit, Derek Chollet.

“Ne po punojmë me Qeverinë e Serbisë dhe vendet e tjera për t’u dhënë fund këtyre aktiviteteve”, u tha ai gazetarëve në Beograd më 12 janar.

Lidhjet me ngjarjet në Kosovë

Në maj të vitit 2022, Kosova iu bashkua mbështetjes për sanksione të Bashkimit Evropian kundër subjekteve dhe grupeve nga Rusia, përfshirë grupin Wagner.

“Individët, të cilët janë në listën e sanksioneve të BE-së, janë të përfshirë në shkelje të rënda të të drejtave të njeriut, duke përfshirë torturat dhe vrasjet”, tha atë kohë zëvendësministri i Punëve të Jashtme dhe Diasporës së Kosovës, Kreshnik Ahmeti, duke aluduar për individë nga grupi Wagner.

Në dhjetor të vitit 2022, organizatat dhe lëvizjet e krahut të djathtë nga Serbia organizuan një protestë në Jarinjë, vendkalimin kufitar midis Serbisë dhe Kosovës, në mes të tensioneve të shtuara në veri të Kosovës në atë kohë. Protesta u organizua me parullën “Lutuni Zotit dhe rrini pas Rusisë”.

Damjan Knezheviq, lideri i ultra të djathtës “Patrulla Popullore”, ishte në Jarinjë. Ky grup organizoi edhe protestën e “mbështetjes së serbëve të Kosovë” më 12 dhjetor në Beograd.

Videoja nga ajo protestë është publikuar nga grupi Wagner në kanalin e tyre në Telegram me komentin “Aksioni patriotik në Beograd në mes të përkeqësimit të situatës në Kosovë”.

Në Serbi, që nga fillimi i pushtimit rus të Ukrainës, paralelisht me protestat kundër luftës në mbështetje të Ukrainës, janë organizuar edhe protesta në mbështetje të pushtimit rus dhe presidentit të Rusisë, Vladimir Putin.

Flamujt rusë dhe shkronja “Z” si një nga simbolet e pushtimit rus të Ukrainës, janë detaje të shpeshta në këto protesta.

Të dhënat e inteligjencës për praninë e Wagner-it në Bosnjë e Hercegovinë

Ministri i Sigurisë i Bosnjë e Hercegovinës, Selmo Cikotiq, konfirmoi në një deklaratë për REL-in më 9 janar se të dhënat e inteligjencës tregojnë praninë e grupit Wagner në atë zonë.

“Këto janë grupe, pak a shumë, ekstreme dhe radikale që kanë qenë të pranishme në këtë zonë për një kohë të gjatë”, tha Cikotiq.

Në prag të Ditës së Republika Sërpskas, e cila u shpall jokushtetuese nga Gjykata Kushtetuese e Bosnjë e Hercegovinës, ai paralajmëroi për praninë e mundshme të anëtarëve të grupeve radikale dhe ekstremiste, duke përfshirë grupin Wagner.

Ekipi i Radios Evropa e Lirë nuk mundi të konfirmonte praninë e anëtarëve të grupit Wagner më 9 janar në Sarajevën Lindore.

Një shtetas i Bosnjës dhe Hercegovinës dyshohet se ka rekrutuar luftëtarë nga Ballkani Perëndimor.

Në dhjetor 2020, portali i pavarur rus, Meduza, publikoi dëshminë e një prej anëtarëve të grupit Wagner, i cili përmendi se në mesin e luftëtarëve të tyre në Ukrainë kishte shtetas të Serbisë, të cilët korrespondonin me një person me emrin Davor Saviçiq, shtetas i Bosnjës dhe Hercegovinës.

“Davor arriti t’u rrënjosë idenë se ‘ju jeni këtu, në Rusi, nën shpenzimet e mia, dhe pa mbështetjen time, do të ktheheni në Serbi’. Pra, 50 [mijë] rubla nga çdo rrogë – për mua (rreth 600 euro)”, kështu e përshkroi Gabidulin atë që ndodhi në lindje të Ukrainës në vitin 2015.

Disa media në Serbi kanë shkruar për Saviçiqin, duke thënë se ai është me origjinë boshnjake, ku ka marrë pjesë në luftë si pjesëtar i formacionit paraushtarak të Gardës Vullnetare Serbe, të udhëhequr nga Zheljko Razhnatoviq Arkan, i cili ishte akuzuar më parë në vitin 1999 nga Gjykata Ndërkombëtare e Drejtësisë në Hagë për krime lufte.

Mediat shkruajnë edhe për Saviçiqin, duke thënë se ai ishte pjesë e Njësisë së Operacioneve Speciale të Ministrisë së Punëve të Brendshme, në krye me Milorad Ulemek Legijan, i cili u dënua më 2007 për organizimin e vrasjes së kryeministrit Zoran Gjinxhiq.

Akuzat për krime lufte

Tre anëtarë të Wagner-it janë akuzuar në Ukrainë se kanë kryer krime lufte në muajin prill 2022 në fshatin Motizhin në afërsi të Kievit, ndërsa shërbimi gjerman i inteligjencës dyshon për mercenarë nga ky grup për përfshirje të mundshme në vrasjet e civilëve në Bucha, gjatë tërheqjes së forcave ruse.

*Video nga arkivi: Rusia akuzohet për mizori në periferi të Kievit

Organizata ndërkombëtare për të drejtat e njeriut Human Rights Watch tha në maj 2022 se ka “prova bindëse” se forcat paraushtarake ruse kanë vrarë civilë dhe kanë kryer shkelje serioze të të drejtave të njeriut në luftën civile në Republikën e Afrikës Qendrore.

Wagner, gjithashtu, përballet me akuza për krime kundër civilëve në Libi.

Në raportin e misionit të pavarur faktmbledhës në Libi, të porositur nga Këshilli i Kombeve të Bashkuara për të Drejtat e Njeriut, ekspertët deklaruan se ka arsye për të besuar se anëtarët e Wagner-it qëlluan drejtpërdrejt mbi njerëzit që nuk morën pjesë në konflikte.

Wagner po ashtu dyshohet se është i lidhur me masakrat dhe vrasjet e civilëve në Mali gjatë vitit 2022./REL

The post Rrjeti i Wagner-it rus në Ballkan appeared first on Albeu.com.

Më konkretisht, autoritetet ruse thuhet se duan të rekrutojnë rreth 20,000 njerëz në mënyrë që ata të ndërmarrin veprime më pas: në Mali, Burkina Faso, Niger, Libinë Lindore (në favor të Dhomës së Përfaqësuesve) dhe Republikën e Afrikës Qendrore.

Pas kryengritjes së dështuar dhe vdekjes së Prigozhin, shumë nga luftëtarët e Wagner nënshkruan kontrata me Ministrinë e Mbrojtjes Ruse, dhe ata të cilët kanë eksperiencë, tani mund të tranferohen në “forcat afrikane” të reja të Kremlinit të quajtura “Korpusi i Afrikës”.

Korpusi i Afrikës ishte emri i forcës së ekspeditës naziste gjermane që luftoi në Afrikë në vitet 1940.

“Rusia po formon “Korpusin e saj Afrikan” për të kontrolluar perandorinë e biznesit të Wagner”, vëren Bloomberg, ndërsa faqja e internetit Gzero kujton se mercenarët e Prigozhin ishin të përfshirë në tregtinë e arit afrikan, diamanteve dhe mineraleve të tjera të çmuara.

The post Rusia: Kremlini po “ngre” një “Wagner” të ri në Afrikë appeared first on Albeu.com.

Pavel Prigozhin duket se po trashëgon shumicën dërrmuese të pasurisë së babait të tij, duke përfshirë këtu grupin mercenar, pronat dhe rreth 100 milionë paundë, sipas një fotografie të postuar në rrjetet sociale të atij që raportohet të jetë testamenti i ish-kreut të Wagner.

Tani ai ka nisur negociatat me gardën kombëtare ruse, Rosgvardia, për ribashkimin e organizatës mercenare në luftimet në Ukrainë, tha Instituti për Studimin e Luftës.

Në një raport mbi Rusinë të publikuar të dielën thuhet se: “Një kanal i njohur Telegram i lidhur me Wagner njoftoi më 1 tetor se djali 25-vjeçar i Yevgeny Prigozhin, Pavel Prigozhin ka marrë “komandën” e Grupit Wagner dhe është duke negociuar me Rosgvardia për ribashkimin e Grupit Wagner në operacionet luftarake në Ukrainë.”

Ish-kreu i Wagner, Yevgeny Prigozhin grumbulloi një pasuri të madhe përpara se të themelonte Grupin Wagner, aleat të Kremlinit, i cili mbështeti luftën e Rusisë në Ukrainë me shërbimet e tyre.

Megjithatë, në gusht, dy muaj pasi 62-vjeçari udhëhoqi ushtrinë e tij private në një rebelim të dështuar kundër udhëheqjes ushtarake ruse, ai vdiq në një aksident ajror pranë Moskës. Shkaku i incidentit ende nuk është përcaktuar.

Sipas dokumentit të shpërndarë, Prigozhin kishte një testament që ishte noterizuar më 2 mars sipas tij i linte pas pjesën më të madhe të pasurisë djalit të Prigozhin, Pavel. Sipas The Times , në të shkruhet “E gjithë pasuria ime . . . si dhe pronat që mund të fitohen nga unë në të ardhmen, ia lë trashëgim Pavel Evgenyevich Prigozhin.”

Krahas Grupit Wagner, Pavel do të trashëgojë rreth 100 milionë paundë, një shtëpi në Shën Petersburg, nëntë shoqëri aksionare dhe aksione në Concord dhe perandorinë e hotelierisë së ngritur nga Yevgeny Prigozhin.

The post Djali i Prigozhin merr drejtimin e Wagner, nis negociatat me Rusinë appeared first on Albeu.com.

Avni Islami, profesor i shkencave të sigurisë në Prishtinë, vlerëson se “formacioni imiton grupin mercenar rus, Wagner”, ndërsa Mentor Vrajolli nga Qendra Kosovare për Studime të Sigurisë thotë se ai nuk ka mundur të veprojë “pa dijen e autoriteteve të Serbisë”.

Një pjesëtar i Policisë së Kosovës u vra dhe disa u plagosën të dielën në përleshjet me një grup të armatosur në pjesën veriore të vendit, të banuar me shumicë serbe.

Autoritetet thanë se rreshteri i policisë, Afrim Bunjaku, vdiq nga plagët e marra gjatë sulmit.

Sipas tyre, sulmuesit e armatosur, rreth 30 syresh, ishin vendosur në manastirin e Banjskës, nga ku shkëmbyen të shtëna me organet e rendit gjatë gjithë ditës së diel.

Ministri i Brendshëm i Kosovës, Xhelal Sveçla, tha se tre sulmues u vranë, ndërsa gjashtë persona të tjerë, që dyshohet se ishin të lidhur me ta, u arrestuan.

Sipas Sveçlës, autoritetet konfiskuan edhe një sasi të madhe armatimi.

Autoritetet e Kosovës bënë përgjegjëse Serbinë për sulmin, ndërsa Beogradi zyrtar serbët e Kosovës.

Çfarë thonë ekspertët e sigurisë?

Profesori Islami thotë për Radion Evropa e Lirë se grupi i armatosur, i cili sulmoi policinë në Banjskë, ishte një formacion i strukturuar dhe i përgatitur mirë.

Sipas tij, grupi nuk funksionoi si i izoluar dhe i vetorganizuar, por si një formacion me uniforma, me armatim specifik dhe i lidhur “me institucionet e sigurisë së Serbisë”.

“Uniformat e tilla i ngjajnë grupit [mercenar rus] Wagner. Duket se ky grup i strukturuar edhe ishte imitues i grupit Wagner”, thotë Islami duke iu referuar mercenarëve rusë që kanë marrë pjesë në luftën në Ukrainë dhe në zona të tjera konflikti.

“Armët e gjata, armët luftarake, të gjitha ato janë armë që përdoren në vijën e parë të frontit nga afërsia. Këto janë të mjaftueshme që të thuhet se ky grup terrorist, i lidhur me shtetin serb, ka kryer terrorizëm shtetëror në një territor të huaj”, thotë Islami.

Vrajolli, nga Qendra Kosovare për Studime të Sigurisë, thotë se, bazuar nga mënyra se si u realizua sulmi në Banjskë, nuk mund të thuhet se formacioni kreu një akt spontan.

Sipas tij, ai veproi i orkestruar dhe me plan për ta destabilizuar pjesën veriore të Kosovës.

Një gjë e tillë, thotë ai, nuk ka mundur të ndodhë pa dijen e autoriteteve të Serbisë.

“Nëse flasim për mënyrën se si ata janë paraqitur, ajo tregon qartë se ata persona janë trajnuar, janë përgatitur, kanë marrë resurse mjaft të kushtueshme që të mund të operojnë. Mendoj se është e pamundshme që [autoritetet serbe] të mos i kenë informacionet. Tash, lind pyetja: A ka qenë drejtpërdrejt shteti serb i përfshirë në këtë strukturë apo kanë qenë elemente radikale të përziera? Kjo është vështirë të konfirmohet. Por, pasi që ka persona të arrestuar, atëherë informacionet se kush i ka shtyrë ata që të organizohen, do të gjenden”, shpreh bindjen Vrajolli.

Çfarë u tha në Prishtinë?

Kryeministri i Kosovës, Albin Kurti, tha se procesi i hetimeve do të ofrojë më shumë të dhëna se kush ishin personat e “formacionit profesionist” që sulmoi policinë, si hynë dhe kur hynë në Kosovë, si dhe kush janë urdhërdhënësit dhe dirigjuesit e sulmit.

“Bëhet fjalë për një formacion terrorist e kriminal, profesionist, i cili e ka planifikuar dhe përgatitur gjatë këtë çfarë ka kryer sot dhe që nuk paraqet një bandë të kontrabandës, por një strukturë mercenare, e cila është e përkrahur politikisht, financiarisht e logjistikisht nga Beogradi zyrtar”, tha Kurti.

Ministri i Punëve të Brendshme të Kosovës, Xhelal Sveçla, tha se bëhet fjalë për “grup terrorist”.

Sipas tij, disa nga sulmuesit janë “pjesëtarë të Mbrojtjes Civile” – organizatë të cilën Qeveria e Kosovës e shpalli terroriste, në fund të qershorit.

Duke folur për Radio Televizionin e Kosovës, Sveçla tha se sulmi kundër Policisë së Kosovës është realizuar me mbështetjen e “shtetit të Serbisë” dhe drejtoi gishtin drejtpërdrejt kah presidenti i Serbisë, Aleksandar Vuçiq.

Çfarë u tha në Beograd?

Vuçiq i hodhi poshtë pretendimet e autoriteteve të Kosovës.

Duke folur në një adresim të drejtpërdrejtë televiziv, ai tha se serbë të Kosovës u rebeluan “duke mos dashur që ta durojnë më tej terrorin e Kurtit”.

Dy nga tre personat e vrarë nga grupi i sulmuesve, tha Vuçiq, janë nga Mitrovica e Veriut.

“Ne ende po kontrollojmë për t’u siguruar që nuk janë emra të rremë”, tha ai.

“Fajtori i vetëm për atë që ndodhi në Kosovë është Albin Kurti”, tha Vuçiq dhe shtoi se sulmuesit nuk kishin uniforma të ushtrisë apo policisë serbe.

Çfarë tha komuniteti ndërkombëtar?

Misioni i NATO-s në Kosovë, KFOR, e dënoi vrasjen e policit Afrim Bunjaku dhe tha se është i gatshëm të ndërhyjë nëse është e nevojshme.

Ambasadori amerikan në Kosovë, Jeffrey Hovenier, tha se i dënon ashpër sulmet “e dhunshme dhe të orkestruara“ ndaj Policisë së Kosovës.

Shefi i politikës së jashtme të BE-së, Josep Borrell, i cili ndërmjetëson edhe bisedimet midis Kosovës dhe Serbisë për normalizimin e marrëdhënieve, tha se ka biseduar të dielën me udhëheqësit e të dyja vendeve.

Borrell, u tha në një komunikatë të zyrës së tij, bëri thirrje për rivendosjen e qetësisë dhe stabilitetit.

Tensionet në veri
Pjesa veriore e Kosovës, përkatësisht komunat Mitrovicë e Veriut, Zveçan, Zubin Potok dhe Leposaviq, janë të banuara me shumicë serbe.

Popullata atje, e ndikuar nga Beogradi zyrtar dhe strukturat që funksionojnë nën udhëheqjen e tij, nuk u bindet vendimeve të institucioneve të Kosovës.

The post REL: Sulmuesit në veri imitues të Wagner, “të strukturuar dhe të përgatitur” appeared first on Albeu.com.

Në një intervistë për median estoneze ‘Delfi’, kreu i qeverisë së Kosovës u shpreh i shqetësuar lidhur me përfshirjen e Rusisë në tensionet ndërmjet Serbisë dhe Kosovës.

Kurti tha kishte marrë kërcënime nga terroristët lidhur me sekuestrimin e një sasie të madhe të armëve dhe municionit në veri të vendit nga Policia e Kosovës.

“Dje kemi konfiskuar një sasi të madhe municionesh dhe kallashnikovë nga një shtëpi në një komunë me shumicë serbe në veri të Kosovës. Pak para se të vija në intervistë, mora një tjetër letër kërcënuese nga terroristët, ku thuhej me tallje se armët që kishim sekuestruar ishin vetëm një pjesë e vogël e pajisjeve të tyre,”- ka deklaruar Kurti.

Kreu i qeverisë së Kosovës, gjithashtu pretendoi se anëtarët e grupit Wagner dhe Ujqërit e Natës, një klub rus i motoçiklistëve i njohur për lidhjen e tij të ngushtë me Kremlinin, kishin hyrë në Kosovë nga Serbia dhjetorin e kaluar. Sipas tij, këta persona kishin krijuar lidhje të ngushta me organizatat terroriste që veprojnë në rajon.

“Kemi dëshmi se disa nga serbët që bojkotuan zgjedhjet ishin të lidhur me grupin ëagner, madje disa prej tyre ishin anëtarë të grupit. Disa anëtarë të Wagner dhe Ujqërve të Natës erdhën në Kosovë nga Serbia dhjetorin e kaluar dhe kanë lidhje të ngushta me dy organizatat terroriste. Dhe një organizatë terroriste po dërgon kërcënime me vdekje për mua dhe ministrin tim të brendshëm”, deklaroi ai.

Kryeministri Kurti ka thënë se Kosova është e trazuar pas ngjarjeve në veri të vendit, ndërsa shton se Serbia me Rusinë janë në raporte tepër miqësore.

The post “Jam i kërcënuar …”. Albin Kurti: Serbët që bojkotuan zgjedhjet në Veri, ishin anëtarë të grupit mercenar “Wagner” appeared first on Albeu.com.

“Wagner është një organizatë e dhunshme dhe shkatërruese që ka vepruar si një mjet ushtarak jashtë vendit për Rusinë e Vladimir Putinit”, tha Braverman, sipas gazetës.

“Ndërsa regjimi i Putinit vendos se çfarë të bëjë me përbindëshin që ka krijuar, aktivitetet e vazhdueshme destabilizuese të Wagner nuk bëjnë gjë tjetër veçse u shërbejnë qëllimeve politike të Kremlinit”, vazhdoi ministrja.

Sekretarja britanike e Brendshme ka fuqinë të “ndalojë” – të nxjerrë jashtë ligjit – organizatat që ajo i konsideron të përfshira në akte terroriste. Kjo “kërkesë” është zbatuar tashmë në 78 raste, veçanërisht ato të Shtetit Islamik dhe Al-Kaedës, sipas Aktit të vitit 2000, dhe në 14 të tjera – veçanërisht duke përfshirë organizatat e Irlandës së Veriut si IRA – sipas legjislacionit të mëparshëm. Është një vepër penale në Mbretërinë e Bashkuar t’i përkasësh ose të mbështesësh këto organizata.

“Wagner është i përfshirë në plaçkitje, tortura dhe vrasje brutale,” argumentoi  Braverman, sipas Daily Mail. “Kjo është arsyeja pse ne e ndalojmë këtë organizatë terroriste dhe vazhdojmë të ndihmojmë Ukrainën kudo që mundemi në luftën e saj kundër Rusisë”, shtoi ministri, për të cilin kompania mercenare është një “kërcënim për sigurinë globale”.

Përfshirja e Wagner në listën e organizatave terroriste do të bëhet me një masë që do të paraqitet në Parlament të mërkurën, sipas raportimeve në shtypin britanik.

Në korrik, Londra njoftoi sanksione kundër 13 individëve dhe subjekteve juridike të lidhura me Wagner në Afrikë, duke i akuzuar ata për krime lufte.

Dy javë pas vdekjes së themeluesit të Wagner, Yevgeny Prigozhin, Moska ende nuk ka njoftuar asgjë në lidhje me shkakun e rrëzimit të avionit në të cilin ai ishte.

The post Britania: Londra do ta klasifikojë Wagnerin si organizatë terroriste appeared first on Albeu.com.

“Natyrisht, versione të ndryshme po shqyrtohen, duke përfshirë versionin, ju e dini se për çfarë po flasim, le të themi, një mizori e qëllimshme”, u tha gazetarëve zëdhënësi i Kremlinit Dmitry Peskov kur u pyet për hetimin, sipas Reuters.

I pyetur nëse Organizata Ndërkombëtare e Aviacionit Civil do të hetonte përplasjen, Peskov tha se rrethanat e bënë atë ndryshe, por paralajmëroi se hetuesit nuk kishin arritur ende në konkluzione zyrtare për atë që ndodhi saktësisht.

“Le të presim rezultatet e hetimit tonë rus”, tha Peskov.

Avioni privat Embraer në të cilin Prigozhin po udhëtonte për në Shën Petersburg nga Moska u rrëzua në veri të Moskës, duke vrarë të 10 personat në bord më 23 gusht, duke përfshirë dy figura të tjera kryesore të Wagner, katër nga truprojat e Prigozhin dhe një ekuipazh prej tre personash.

The post Kremlini e pranon: Avioni i Prigozhin mund të jetë rrëzuar qëllimisht appeared first on Albeu.com.

Duke komentuar mungesën e djeshme të liderit rus në funeralin e Prigozhin, i cili u mbajt në një rreth të mbyllur, Dr. Valerie Solovey pohon se avioni që u rrëzua në Moskë javën e kaluar mbante një tjetër dhe jo vetë kreun e Wagner.

Siç raporton gazeta britanike “Daily Mail”, analisti rus pretendon se kuzhinieri dikur i preferuar dhe aleati i ngushtë i Putinit fshihet në një vend të huaj për sigurinë e tij dhe se lideri i fuqishëm i Kremlinit qëndron vërtet pas rrëzimit të avionit të mërkurën e kaluar në kryeqytetin rus.

“Prigozin është gjallë dhe planifikon të hakmerret ndaj Putinit pas vdekjes së të besuarit të tij dhe shumë prej bashkëpunëtorëve të tij të ngushtë”, pohon analisti rus, duke shtuar: “Ai është në gjendje të mirë shëndetësore dhe i lirë dhe kjo do të zbulohet gjatë këtij viti”.

Megjithatë, nuk dihet se në cilin vend ka gjetur strehim, siç theksoi Dr. Valerie Soloway.

The post “Prigozhin është gjallë”, habit analisti rus: Po përgaitet hakmarrja ndaj Putin appeared first on Albeu.com.

Kapiteni i Wagner-it, ka zbuluar Daily Mail, kishte zhveshur kamuflazhin e tij dhe është shfaqur me rroba civile i rrethuar nga vendas të buzëqeshur, të cilët nuk mund ta fshihnin emocionin e tyre që e takuan atë.

Madje, vendasit nuk kanë ngurruar të pozojnë me të dhe ta përqafojnë. Ndalesa e tij e radhës ishte Mali, ku sërish veshi rrobat ushtarake dhe duke mbajtur një armë në duar realizoi videon e fundit.

Në të ai foli për përpjekjet e Wagner-it për ta “bërë të gjithë kontinentin afrikan më të lumtur”.

“Ne po punojmë.. temperatura është mbi 50 gradë Celsius, ashtu siç na pëlqen… Wagner po e bën Rusinë më të madhe në të gjitha kontinentet dhe Afrikën më të lirë”, dëgjohet të thotë ai.
WagnerDisa ditë më vonë, Prigozhin u vra në një aksident ajror në atë që besohet të jetë hakmarrje nga Putini dhe Kremlini pas rebelimit të dështuar të Ëagner në qershor. Këto foto në rrjetet sociale janë të parat që janë publikuar pasi vdekja e tij u konfirmua zyrtarisht nga autoritetet ruse të shtunën. /Albeu.com.

The post “I buzëqeshur, duke bërë selfie në Afrikë”, fotot e fundit të Prigozhin para se të vdiste appeared first on Albeu.com.

Sipas medias Moskovsky Komsomolets në aparat mund të jetë vendosur një bombë, e cila është zëvendësuar për një defekt më 19 gusht.

“Corriere della Sera” shpjegon se gjithçka do të lidhej pra me një dështim në sistemin që rregullonte klimatizimin e avionit. Pas problemit, i cili daton në 18 korrik, do të ishte kërkuar një avion zëvendësues dhe avioni do të kishte qëndruar i palëvizshëm për javë të tëra pranë Moskës, në aeroportin Sheremetyevo. Në atë moment do të krijohej mundësia për të vendosur bombën në kondicionerin e ri.

Zakonet e një njeriu në rrezik të vazhdueshëm

Gazeta ruse Moskovsky Komsomolets shpjegon se kreu i Ëagner ndryshonte planet e tij në minutën e fundit, duke modifikuar orarin e tij për arsye pune, por mbi të gjitha për sigurinë e tij personale. Ai udhëtim për në Shën Petersburg duhej të bëhej në datën 20, por fluturimi ishte shtyrë për në datën 23. Më pas pati ndryshime në orar dhe në listën e pasagjerëve, nga tre në shtatë. Gjithçka normale për një personazh si Prigozhin, i cili merrej me negociata me rivalët dhe për këtë arsye ishte në rrezik të vazhdueshëm.

Vizita e dy blerësve hipotetikë
Megjithatë, vendimi për t’u treguar avionin, një Embraer, dy blerësve kandidatë, Alexandra Yulina dhe Sergey Klokotov, drejtues të kompanisë Rusjet, ngjall më shumë dyshime, të cilët hipën në aeroplan pasi ia dorëzuan pasaportën, praktikë normale në këto raste, në caktimin e datës 23 gusht (ishte caktuar për datën 19, por është shtyrë pikërisht për riparimin e kondicionerit).

Natalia Minibayeva shumë e besueshme, e cila kishte qenë në krah të Prigozhin për tetë vjet, e kishte menaxhuar situatën. Gjatë vizitës ishte i pranishëm edhe piloti Rustam Karimov. Nëse askush nuk ka vërejtur veprime të dyshimta në atë rast, nuk dihet asgjë për momentet e mëpasshme, para ngritjes. Përveç hipotezës së kondicionerit, ekziston edhe ajo e një bombe të vendosur pranë krahut.

Heshtja në funeral dhe varrim
Dhe, ndërsa në Moskë kreut të Ëagnerit i bëhen homazhe në shumë memorialë në qytet, ka heshtje për funeralin dhe varrimin e Prigozhin. Një kanal Telegram pranë shërbimeve të sigurisë shkruan se ceremonia mund të mbahet me dyer të mbyllura sot në Shën Petersburg. Kishte pasur propozime të ndryshme, pothuajse të gjitha të lidhura me një funeral në vendet e pushtuara: flitej veçanërisht për Bakhmout. Por duket se autoritetet po përpiqen që lamtumira e fundit për Prigozhin të mos kthehet në një ngjarje në mbështetje të mercenarëve dhe për këtë arsye do të ishte zgjedhur një funksion privat. Asgjë nuk dihet as për varrimin, i cili dyshohet se mund të bëhet në një vend adhurimi. Pra, gjithçka mbetet e mbuluar me mister, teksa Vladimir Putin pritet të mungojë.

The post Bombë në kondicioner? Heshtja mbulon funeralin e Prigozhin, vizita e dyshimtë para rrëzimit të avionit appeared first on Albeu.com.