Zulfaj i kërkon Budapestit përkrahje për kandidaturën e Kosovës në BE

Gjatë vizitës së tij në Budapest, kryenegociatori i Kosovës për dialogun me Bashkimin Evropian, Jeton Zulfaj, ka kërkuar angazhimin e Hungarisë që Kosova të marrë statusin e vendit kandidat dhe të nisë negociatat për anëtarësim në BE.

Vizita ka nisur me një takim me zëvendësministrin hungarez të Punëve të Jashtme, Laszlo Gyorgy Velkey, bëhet e ditur në njoftimin zyrtar.

Zulfaj shprehu mirënjohje për kontributin e Hungarisë në ruajtjen e paqes dhe sigurisë në Kosovë përmes misionit të NATO-s, KFOR.

“Hungaria është kontribuuesi i madh i misionit”, ka thënë ai.

Gjatë bisedës, ai vlerësoi edhe programin e bursave “Stipendium Hungaricum”, falë të cilit qindra studentë nga Kosova kanë ndjekur studimet në universitetet e Hungarisë.

Një pjesë e rëndësishme e diskutimeve iu kushtua integrimit evropian të Kosovës, në prag të publikimit të Pakos së Zgjerimit nga Komisioni Evropian, i parashikuar për fundin e tetorit.

Kryenegociatori kosovar i bëri thirrje Hungarisë të mbështesë marrjen e statusit kandidat nga Kosova dhe hapjen e negociatave për anëtarësim në Bashkimin Evropian.

Ai nënvizoi se zgjerimi duhet të mbështetet te meritat e secilit vend, duke nisur nga respektimi i vlerave themelore të BE-së dhe përafrimi me politikën e saj të jashtme.

Sipas Zulfajt, Kosova i përmbush këto kritere përmes demokracisë, lirive, sundimit të ligjit dhe mbrojtjes së të drejtave të njeriut.

Në përmbyllje të takimit, ai falënderoi Hungarinë për mbështetjen e dhënë dhe vlerësoi angazhimin e saj në grupin “Miqtë e Ballkanit Perëndimor”, duke kërkuar përkrahjen e Budapestit për hapat e ardhshëm të Kosovës drejt anëtarësimit në Bashkimin Evropian.