Zulfaj dhe Barley bisedojnë për rrugën e Kosovës drejt Bashkimit Evropian

Kosova synon të avancojë në procesin e integrimit evropian, ndërsa kjo çështje ishte në qendër të takimit mes kryenegociatorit të Kosovës me Bashkimin Evropian, Jeton Zulfaj, dhe Katarina Barley, nënkryetares së Parlamentit Evropian dhe nënkryetares ekzekutive të Partisë së Socialistëve Evropianë (PES).

Gjatë diskutimit, palët u ndalën te perspektiva evropiane e Kosovës dhe zhvillimet e fundit gjeopolitike në Evropë, të cilat kanë rikthyer zgjerimin e BE-së në vëmendjen e institucioneve evropiane.

Zulfaj shprehu mirënjohje për Barley për mbështetjen e dhënë ndaj përparimit të Kosovës në rrugën drejt anëtarësimit në Bashkimin Evropian.

Ai theksoi se objektivat kryesore të Kosovës mbeten marrja e statusit të vendit kandidat dhe nisja e negociatave për anëtarësim në BE.

Kryenegociatori vlerësoi gjithashtu rolin e Barley në sigurimin e mbështetjes politike brenda institucioneve evropiane, në mënyrë që perspektiva evropiane e Kosovës të shndërrohet në hapa konkretë institucionalë.

Takimi u zhvillua në një periudhë kur zgjerimi i Bashkimit Evropian po rikthehet në qendër të debatit politik evropian, ndërsa Kosova po kërkon përkrahje për avancimin e procesit të integrimit dhe për hapat e ardhshëm drejt anëtarësimit.