Zemaj: Statuti e obligon mbledhjen e nënshkrimeve, Kuvendi i Jashtëzakonshëm mund të kërkohet nga 1/3 e delegatëve

Armend Zemaj, deputet i zgjedhur i LDK-së, ka bërë të ditur se sigurimi i nënshkrimeve për thirrjen e Kuvendit të Jashtëzakonshëm të partisë përbën një detyrim që buron nga statuti.

Sipas tij, e drejta ligjore dhe statutare për të kërkuar një mbledhje të jashtëzakonshme me një qëllim të caktuar u takon një të tretës së delegatëve të Lidhjes Demokratike të Kosovës.

Zemaj ka theksuar se bëhet fjalë për një obligim statutar dhe ligjor, të përcaktuar nga statuti i LDK-së, i cili ua mundëson një të tretës së delegatëve të thërrasin një mbledhje të jashtëzakonshme të Kuvendit të Lidhjes Demokratike të Kosovës për një çështje të caktuar.

Ai ka njoftuar se janë mbledhur 118 nënshkrime nga gjithsej 355 delegatë, ndërsa ka konfirmuar se ky numër është arritur dhe është verifikuar.

Duke folur për delegatët, Zemaj ka thënë se ata e kanë marrë besimin në kuvendet e degëve dhe gëzojnë kredibilitet në strukturat e partisë.

Ai i ka përshkruar ata si personalitete me kontribut të gjatë në LDK, me identitet dhe reputacion, përvojë profesionale dhe rol të rëndësishëm në parti.

Sa i përket verifikimit, Zemaj ka vlerësuar se ai zhvillohet në kuadër të procedurave të brendshme partiake dhe se nuk është e nevojshme të shndërrohet në çështje të debatit publik.

Sipas tij, trajtimi i kësaj teme dëshmon se ekziston një distancim ndërmjet lidershipit dhe anëtarësisë së LDK-së.

Zemaj ka shprehur kritika edhe për mënyrën se si disa pjesëtarë të udhëheqjes po sillen ndaj delegatëve, duke kërkuar prej tyre që t’i qartësojnë pozicionet e veta.

Në përfundim, ai ka deklaruar se i njeh të gjithë 355 delegatët, prejardhjen e tyre, identitetin dhe pozitat që kanë mbajtur. Zemaj ka shtuar se njeh gjithashtu rrethin, familjet dhe familjarët e tyre që janë pjesë e LDK-së, duke sqaruar se ky pohim nuk synon të tingëllojë subjektiv apo personal.