Ymeri lidh protestat e dhunshme në Shqipëri me përvojën politike të Kosovës

Deputetja e Lidhjes Demokratike të Kosovës, Janina Ymeri, komentoi protestat e dhunshme në Shqipëri duke i krahasuar me zhvillimet politike në Kosovë dhe ardhjen në pushtet të Lëvizjes Vetëvendosje.

Në një postim në Facebook, Ymeri tha se protesta të tilla ishin përdorur më parë në Kosovë dhe, sipas saj, i kishin hapur rrugën Albin Kurtit dhe bashkëpunëtorëve të tij për të marrë pushtetin. Ajo i cilësoi ata si të papjekur në aspektin menaxherial dhe shoqëror, ndërsa pretendoi se, edhe pas gjashtë vitesh, vazhdojnë me hajni, skandale dhe stagnim.

Sipas Ymerit, kalimi i një grupi nga rruga në zyra tregoi se synimi i tij nuk ishte ndryshimi i vendit, por krijimi i një “klike”. Ajo sqaroi se komenti i saj nuk ishte vlerësim për gjendjen në Shqipëri, por një këndvështrim që, sipas saj, duhet t’i ndihmojë Gen Z të kuptojë se Kosova e ka përjetuar tashmë këtë episod.

Ajo shtoi se situata në Shqipëri mund të sjellë në udhëheqje njerëz me përvojë politike dhe drejtuese. Megjithatë, Ymeri vlerësoi se në Kosovën e pasluftës kalimi nga dhuna në rrugë te zyrat nuk ka qenë një përvojë e mirë.