Ulutaş pritet nga Hoxha, KFOR-i dhe Policia e Kosovës rikonfirmojnë bashkëpunimin për sigurinë

Drejtori i përgjithshëm i Policisë së Kosovës, kolonel Gazmend Hoxha, së bashku me bashkëpunëtorët e tij, priti në selinë e institucionit në Prishtinë komandantin e misionit të KFOR-it të udhëhequr nga NATO, gjeneralmajor Özkan Ulutaş, dhe zëvendëskomandantin e KFOR-it, gjeneral brigade Federico Collina.

Në takim u trajtuan bashkëpunimi i vazhdueshëm në çështjet e sigurisë dhe veprimtaritë që KFOR-i dhe Policia e Kosovës zhvillojnë në mënyrë të koordinuar. Palët nënvizuan nevojën për ta ruajtur bashkërendimin e ngushtë mes tyre.

Përfaqësuesit e të dyja palëve rikonfirmuan gjithashtu angazhimin e përbashkët për ta thelluar më tej këtë bashkëpunim.

Gjeneralmajor Özkan Ulutaş deklaroi se misioni i NATO-s do të vijojë të bashkëveprojë ngushtë me institucionet vendore, me synimin për të siguruar një ambient të qetë dhe të sigurt për të gjithë qytetarët e Kosovës, duke vepruar në mënyrë të paanshme dhe transparente.

KFOR-i rikujtoi se vijon përmbushjen e mandatit që buron nga Rezoluta 1244 e Këshillit të Sigurimit të OKB-së e vitit 1999. Ky mandat parashikon kontributin për ruajtjen e një mjedisi të sigurt e të qetë, si dhe garantimin e lirisë së lëvizjes për të gjithë qytetarët e Kosovës.

Në njoftim thuhet se KFOR-i vazhdon bashkërendimin e afërt me Policinë e Kosovës dhe me Misionin e Bashkimit Evropian për Sundimin e Ligjit në Kosovë (EULEX), në përputhje me përgjegjësitë e tyre si reagues të sigurisë.