Trepça rikthen në pronësi ish-Bankën Komerciale në Zveçan

Ambientet e ish-Bankës Komerciale, të vendosura në qendër të Zveçanit, tashmë janë sërish në posedim të ndërmarrjes publike „Trepça“. Vendimi për lirimin e kësaj prone ishte bërë i ditur përmes një njoftimi zyrtar më 12 gusht.

Faton Ahmeti, ushtrues detyre i kryeshefit ekzekutiv të „Trepçës“, deklaroi për KosovaPress se ndërmarrja po vijon punën për gjetjen dhe rikthimin e pronave të saj që janë përdorur pa dokumentacion të vlefshëm.

“Në kuadër të ndërmarrjes jemi duke përfshirë edhe disa parcela të tjera. Po evidentojmë gjithashtu objekte për të cilat më parë nuk kemi pasur të dhëna. Në këtë proces përfshihen posta, një barnatore dhe ish-banka e strukturave. Ne po veprojmë mbi bazën e autorizimeve, me qëllim mbrojtjen e pasurisë së ndërmarrjes dhe kthimin e saj te pronari”, tha Ahmeti.

Sipas tij, çdo ndërhyrjeje i paraprijnë njoftimet përkatëse, ndërsa personave që i shfrytëzojnë pronat u lihet kohë për të dorëzuar dokumentet e pronësisë, nëse i kanë ato.

“Zakonisht, përpara lirimit të pronës vendosim disa njoftime në dyert e hyrjeve. Nëse shfrytëzuesit kanë dokumente që nuk i disponojmë ne, u japim disa ditë kohë për t’i paraqitur. Ka pasur raste kur janë dorëzuar kontrata shitblerjeje ose fletë poseduese dhe atëherë nuk kemi ndërmarrë asnjë veprim. Kur nuk paraqitet asnjë dëshmi se prona u përket atyre, ne veprojmë për lirimin e saj”, sqaroi ai.

Ahmeti bëri të ditur se, pasi përfundon afati i paralajmërimit, lajmërohet policia për të qenë e pranishme gjatë hapjes së lokalit, ndërsa zbatimi i aksionit kryhet nga zyrtarët e „Trepçës“.

Ai shtoi se të dhënat për pronat në veri të vendit mblidhen në mënyrë kronologjike nga një task-force e krijuar nga ndërmarrja.

“Vetëm gjatë këtyre dy javëve kemi rikthyer rreth pesë lokale, si dhe një parking të madh me disa garazha, me sipërfaqe mbi 1600 metra katrorë. Nuk kemi shumë informacione në terren, por sa herë që mësojmë se një pronë është e jona, task-forca e organizuar bashkëpunon me Administratën Tatimore dhe Inspektoriatin Komunal, siguron të dhënat dhe nis procedurat deri në rikthimin e pronës”, përfundoi Ahmeti.

Operacioni për lirimin e disa objekteve në veri të Kosovës ka nisur në mesin e gushtit. Njoftimet e para u vendosën më 12 gusht në hapësirat e ish-Postës, ish-Bankës Komerciale në Zveçan dhe një barnatoreje që në atë kohë ishte ende në funksion.

Procedura vijoi me vendosjen e njoftimeve në Shtëpinë e Pensionistëve dhe në një kafene përgjatë shëtitores së Mitrovicës së Veriut. Më 28 gusht, aksioni u zgjerua edhe në një objekt garazhi në Zveçan.