Tre muaj pas vdekjes së policit Altin Kryeziu, familjarët shprehin dhimbjen për mungesën e tij

Tre muaj pas humbjes së Altin Kryeziut, zyrtarit policor që u godit nga një veturë teksa ishte në detyrë në Malishevë, familja vazhdon ta përjetojë rëndë mungesën e tij.

Aulonë Kryeziu ka publikuar në rrjetet sociale një dedikim për vëllain e saj. “Koha ecën, por zemra ime ka mbetur aty ku të humba. Mungesa jote është një dhimbje që nuk njeh shërim, e malli për ty do të jetojë në çdo rrahje të zemrës sime”, ka shkruar ajo.

Aulona shprehet se ende nuk është mësuar të jetojë pa të dhe se dhimbja e kësaj humbjeje mbetet e vështirë për t’u përballuar. Dedikimin e mbyll me fjalët: “Jeta është shumë e vështirë pa ty, vëllai jem”.

Altin Kryeziu shërbente në Stacionin Policor në Malishevë. Më 16 gusht, gjatë kryerjes së detyrës zyrtare në rrugën “Ibrahim Mazreku”, ai u godit nga një automjet. Si pasojë e plagëve të marra, ndërroi jetë më 23 gusht.

Familjarët e Altinit kanë kërkuar drejtësi dhe transparencë për rastin. Më 13 nëntor, Valon Kryeziu, një familjar i tij, u bëri thirrje Kryeprokurorit të Shtetit dhe mediave ta ndiqnin nga afër procesin gjyqësor, në mënyrë që të shqyrtoheshin të gjitha rrethanat e ngjarjes.

Varrimi i Altin Kryeziut u bë më 24 gusht, me nderime shtetërore, në fshatin Bubavec të Malishevës.