Tahiri kritikon vonesën e ligjit për Specialen: Nuk është dokument i NASA-s

Deputeti i Aleancës, Besnik Tahiri, ka reaguar ndaj institucioneve të Kosovës për mosdërgimin ende në Kuvend të projektligjit që synon ndryshimin dhe plotësimin e Ligjit për Dhomat e Specializuara.

Një javë para se të merret vendimi nëse vendi do të përballet apo jo me zgjedhje të reja, Tahiri ka vlerësuar se çështjet kryesore po trajtohen sërish vetëm në momentet e fundit.

“Sot, kur na ndan vetëm një javë nga vendimi i Kuvendit për zgjedhjet e mundshme, temat serioze vazhdojnë të shtyhen deri në 24 orët e fundit. Kjo mënyrë qeverisjeje e ka sjellë shoqërinë në një pikë ku gjithçka zvarritet dhe institucionet lëvizin vetëm kur përballen me krizë. Pse Ministria e Drejtësisë nuk e dërgon Ligjin në Kuvend? Nuk bëhet fjalë për ndonjë dokument analitik të NASA-s, por për një ligj me disa nene që mund të shqyrtohet, të ndryshohet dhe të votohet. Pse po ndiqet kjo qasje anti-shtetërore? Kujt po ia lëmë barrën në këtë mënyrë?”, ka shkruar Tahiri.

Ai ka ngritur gjithashtu pyetjen se përse nuk po zhvillohet një debat i mirëfilltë lidhur me zgjedhjen e presidentit.

“Përse nuk po diskutohet seriozisht për ndërtimin e një shteti funksional dhe për llogaridhënien? Sepse krijohet përshtypja se synimi nuk është zgjidhja e krizave, por kalimi i vazhdueshëm nga një krizë te tjetra. Kjo nuk mund të quhet qeverisje. Është vetëm shtyrje e problemit deri në çastin e fundit. Shteti nuk drejtohet në 24 orët e fundit”, ka deklaruar ai.