Tahiri kërkon rikthimin e Kurtit dhe Vetëvendosjes në Kuvend për votimin e ligjit

Deputeti i Partisë Demokratike të Kosovës (PDK), Arian Tahiri, ka dalë në sheshin ku po mbahet protesta për miratimin e Ligjit për Dhomat e Specializuara. Me të ishte edhe Altin Krasniqi, djali i ish-kryetarit të Kuvendit dhe ish-krerëve të UÇK-së, Jakup Krasniqi.

Gjatë prononcimit për media, Tahiri dënoi përdorimin e gazit lotsjellës ndaj protestuesve, duke vlerësuar se qytetarët po shprehin kërkesën e tyre në mënyrë të qetë, dinjitoze dhe me thirrje për miratimin e ligjit.

Ai e cilësoi të papranueshme dhunën dhe përdorimin e gazit ndaj qytetarëve të Kosovës, të cilët, sipas tij, po protestojnë me krenari dhe po brohorasin “UÇK, UÇK”. Tahiri tha se kërkesa për votimin e ligjit është e arsyeshme, e domosdoshme dhe e nevojshme në rrethanat aktuale.

Tahiri sqaroi se ai dhe Krasniqi kanë qëndruar në shesh, ndërsa pjesa tjetër e deputetëve të PDK-së ndodhet në Kuvend. Sipas tij, kjo është bërë në përputhje me kërkesën e protestuesve që deputetët të qëndrojnë në institucion dhe ta miratojnë ligjin.

“Unë jam këtu bashkë me Altinin, ndërsa kolegët e tjerë janë në Kuvendin e Kosovës. Kjo përputhet me kërkesën e qytetarëve që deputetët të jenë sot në Kuvend dhe ta votojnë ligjin në tërësi”, deklaroi ai.

Deputeti rikujtoi se Ligji për Dhomat e Specializuara tashmë është miratuar në lexim të parë. Ai kërkoi që procedura të përmbyllet me votimin e tij edhe në leximin e dytë.

Tahiri tha se mocioni i propozuar për këtë çështje nuk mori mbështetjen e nevojshme dhe theksoi se kanë mbetur vetëm edhe disa orë. Për këtë arsye, ai u bëri thirrje Vetëvendosjes dhe Albin Kurtit të kthehen në Kuvend dhe ta votojnë ligjin.

Sipas deputetit të PDK-së, miratimi i këtij ligji duhet të trajtohet si një çështje më vete dhe nuk duhet të kushtëzohet nga procesi i zgjedhjes së presidentit.

“Ky ligj përbën një obligim kombëtar dhe institucional për të gjithë ne. Duhet të kthehemi sa më shpejt në Kuvend, të qëndrojmë aty dhe ta miratojmë”, u shpreh Tahiri.

Ai kundërshtoi çdo përpjekje për ta lidhur ligjin me zgjedhjen e presidentit, duke nënvizuar se bëhet fjalë për dy procese të ndara. Tahiri tha se çështja e presidentit nuk duhet të shndërrohet në mjet për pazar politik, pasi ligji është obligim kombëtar, ndërsa zgjedhja e presidentit është përgjegjësi politike.

Në përfundim, Tahiri kërkoi që partitë politike të arrijnë konsensus për zgjedhjen e presidentit, por theksoi se përparësi mbetet votimi i Ligjit për Dhomat e Specializuara.

“Në këto rrethana do të ishte e dobishme të gjendej konsensusi dhe të arrihej marrëveshja për presidentin. Megjithatë, më e rëndësishmja është që ligji të votohet”, përfundoi ai.