Tahiri: Aleanca nuk e ka ndryshuar qasjen ndaj Qeverisë Kurti, s’kërkon poste apo marrëveshje për ekzekutivin

Besnik Tahiri, deputet i zgjedhur i Aleancës, ka bërë të ditur se partia që përfaqëson vazhdon të mbajë të njëjtin qëndrim ndaj Qeverisë Kurti dhe nuk është duke synuar as marrëveshje politike, as pozita për t’u bërë pjesë e ekzekutivit.

Sipas tij, nëse raporti i Aleancës me Qeverinë Kurti do të kishte pësuar ndryshim, atëherë partia do të kishte hyrë në bisedime për përfshirje në qeveri.

“Pozicioni i Aleancës në raport me Qeverinë Kurti nuk ka ndryshuar, po të kishte ndryshuar ai raport, ne do të ndërtonim marrëdhënie politike, do të synonim të kemi marrëveshje politike për të qenë në qeveri. Ne e kemi thënë shumë qartë, që ne nuk po kërkojmë pozicione as marrëveshje politike për qeveri. Ne kemi thënë se deri më tani kanë ndodhur tri palë zgjedhje dhe kemi dhënë një pozicion politik me gjashtë kushte që mendojmë janë shumë të rëndësishme”, deklaroi ai.

Tahiri foli edhe për variantin e krijimit të një qeverie të pakicës, duke vlerësuar se një lëvizje e tillë do të synonte prodhimin e një bllokade të re dhe hedhjen e fajit mbi ish-opozitën nga ana e Qeverisë në detyrë.

“Me vendimin i tij për të themeluar një qeveri të pakicës me 62 ose 63 vota ka vetëm një qëllim, të na fusë në 60 ditëshin e ardhëm, kur është koha për ta zgjidhur presidentin, dhe të na fusë në një situatë ku thonë ‘ja këta po na bllokojnë’. Jo, zotëri, nuk po të bllokojmë. Nuk po të bllokojmë, sepse votat i ke marrë. Në logjikën e publikut, çdo kompromis shihet si koncesion. Aleanca nuk ka bërë asnjë koncesion me pozicionin e vet politik si parti politike”, deklaroi ai.