Studentët marshojnë nesër në Prishtinë kundër vendimit të Gjykatës Speciale

Studentët kanë njoftuar se të hënën do të organizojnë një protestë në Prishtinë, ndërsa kanë ftuar qytetarët t’u bashkohen në kundërshtim të vendimit të Gjykatës Speciale ndaj ish-krerëve të UÇK-së.

Marshimi do të nisë në orën 11:30 nga Qendra e Studentëve dhe do të vijojë drejt sheshit “Skënderbeu”. Fjalimet e studentëve janë planifikuar të fillojnë në orën 12:00.

Flon Kastrati nga Parlamenti Studentor deklaroi se protesta synon të përcjellë një mesazh uniteti, dinjiteti dhe solidariteti në një periudhë të rëndësishme për vendin.

Kastrati bëri të ditur se studentët e Universitetit të Prishtinës, së bashku me përfaqësues nga universitete të tjera publike dhe private, kanë hartuar një memorandum me gjashtë pika. Dokumenti do të lexohet nga studentët dhe do të publikohet pas përfundimit të marshit.

Donart Humolli, koleg i Kastratit, tha se studentët e konsiderojnë reagimin ndaj aktgjykimit një detyrim moral dhe përgjegjësi qytetare.

Sipas tij, Parlamenti Studentor i Universitetit të Prishtinës nuk mund të qëndrojë i heshtur përballë një vendimi që e vlerëson si thellësisht të padrejtë ndaj çlirimtarëve. Humolli theksoi se ata që kontribuuan për lirinë e vendit dhe mundësuan që studentët të arsimohen të lirë, aktualisht ndodhen në Hagë.

Ai kërkoi nga institucionet mbështetje financiare deri në përfundimin e procesit gjyqësor dhe deri në kthimin e çlirimtarëve në vendin e tyre.

Humolli kërkoi gjithashtu mbështetje të pakushtëzuar financiare, si dhe përkrahje të plotë politike e morale për të akuzuarit, deri në përfundimin e procesit dhe kthimin e tyre pranë familjeve.

Duke e cilësuar situatën si të vështirë dhe të rëndë, ai tha se studentët e shohin të domosdoshme një thirrje për unitet kombëtar.

Organizatorët presin që protestës t’i bashkohen studentë nga qytete të tjera, universitete publike e private, si dhe studentë nga Maqedonia e Veriut.

Studentët shprehën mbështetjen e tyre ndaj kësaj çështjeje dhe u kërkuan subjekteve politike të tregojnë më shumë unitet në këto momente.