Shqipëria angazhon 17 ushtarakë dhe një helikopter në misionin e KFOR-it në Kosovë

Këshilli i Ministrave miratoi sot përfshirjen e Forcave të Armatosura në operacionin ushtarak ndërkombëtar “KFOR” në Kosovë, me një kontingjent prej 17 ushtarakësh dhe një helikopter.

Personeli shqiptar do të sigurojë mbështetje ajrore për forcat e KFOR-it gjatë misioneve për njohjen e terrenit, zbulimin, patrullimin, rastet CASEVAC dhe SAR, si edhe për transportin e trupave dhe të personave VIP brenda zonës së operacionit.

Në përputhje me planet dhe marrëveshjen e KFOR-it me Kosovën, ushtarakët shqiptarë do të angazhohen gjithashtu në ndihmë të popullsisë gjatë emergjencave civile.

Helikopteri dhe personeli i Forcave të Armatosura të Republikës së Shqipërisë do të dislokohen në kampin Boondsteel, në Ferizaj të Kosovës.

Misioni do të vijojë deri më 31 dhjetor 2029. Qëndrimi do të organizohet me rotacion, me periudha deri në 3 muaj për personelin e kontingjentit dhe deri në 6 muaj për helikopterin.

Për ushtarakët e angazhuar në këtë operacion, Ministria e Mbrojtjes do të përballojë, përveç pagës mujore, dietën prej 12 000 lekësh në ditë për të gjithë periudhën e qëndrimit në mision.

Pjesëmarrësve në mision do t’u mbulohen gjithashtu akomodimi, ushqimi dhe çdo shpenzim tjetër i nevojshëm për zhvillimin normal të operacionit.