Shoqatat e Familjeve të Dëshmorëve dhe Invalidëve të UÇK-së ftojnë qytetarët në marshin e “Liria ka Emër

Shoqata e Familjeve të Dëshmorëve të Luftës së UÇK-së dhe Shoqata e Invalidëve të Luftës së UÇK-së njoftuan se po bashkëpunojnë ngushtë me organizata dhe këshilla të ndryshme mbarëkombëtare, me synimin që më 16 shtator krerëve të Ushtrisë Çlirimtare të Kosovës t’u bëhet një pritje dinjitoze me rastin e kthimit të tyre në vend.

Kryetari i Shoqatës së Familjeve të Dëshmorëve të UÇK-së, Xhavit Jashari, u bëri thirrje të gjithë qytetarëve që t’i bashkohen marshit të 12 shtatorit, të thirrur dhe organizuar nga platforma “Liria ka Emër”.

Jashari sqaroi se shoqata që ai drejton nuk është organizatore e protestës së 12 shtatorit, por po bashkëpunon me platformën “Liria ka Emër”, Shoqatën e Invalidëve të Luftës dhe organizata të tjera autoktone. Ai kërkoi pjesëmarrje pa dallim në këtë marsh dhe protestë, si kundërshtim ndaj atyre që i cilësoi shpifje kundër luftës së Ushtrisë Çlirimtare të Kosovës.

Sipas tij, qytetarët duhet të jenë gjithashtu të përgatitur për verdiktin përfundimtar. Jashari shprehu shpresën që gjykata ta ndajë qëndrimin e saj nga ai i prokurorisë, të cilin e quajti absurd në raport me krerët e Ushtrisë Çlirimtare të Kosovës, raporton KosovaPress.

Jashari iu drejtua edhe personave që, sipas tij, e fyejnë dhe e shajnë Ushtrinë Çlirimtare të Kosovës, si dhe ish-krerët e saj që po mbahen në Hagë.

Ai deklaroi se sulmet ndaj UÇK-së, luftës së saj dhe krerëve që, sipas tij, po mbahen padrejtësisht në Hagë, përbëjnë njëkohësisht fyerje dhe sharje ndaj shtetësisë së Kosovës.

Kreu i Shoqatës së Familjeve të Dëshmorëve u bëri edhe një herë thirrje të gjitha institucioneve, partive politike dhe shqiptarëve kudo që ndodhen që të dalin sa më masivisht, të marshojnë dhe të jenë të gatshëm për pritjen. Ai tha se, nëse Gjykata e Hagës merr një vendim politik që nuk lidhet me drejtësinë, shoqatat nuk do të qëndrojnë duarkryq. Sipas Jasharit, kjo është një gjykatë politike, si në mënyrën e krijimit, ashtu edhe në veprimtarinë e saj të deritanishme, raporton KosovaPress.

Thirrjes për pjesëmarrje iu bashkua edhe kryetari i Shoqatës së Invalidëve të Luftës së UÇK-së, Fadil Shurdhaj. Ai kërkoi që të gjithë shqiptarët të jenë të pranishëm në protestën që do të zhvillohet më 12 shtator në sheshin “Skenderbeu”.

Shurdhaj ftoi shqiptarët nga Kosova, Maqedonia e Veriut, Mali i Zi, Presheva, Medvegja dhe të gjitha hapësirat shqiptare, si dhe mërgimtarët, që më 12 shtator, në orën 14:00, të vijnë në Prishtinë dhe të protestojnë në mënyrë dinjitoze, në pritje të verdiktit final të 16 shtatorit.

Ai u bëri thirrje veteranëve, invalidëve, familjeve të dëshmorëve dhe të gjithë atyre që e duan lirinë dhe Kosovën, që më 12 shtator të jenë pjesë e tubimit në sheshin “Skenderbeu”.

Gjykata Speciale në Hagë do ta shpallë më 16 shtator verdiktin final për ish-krerët e Ushtrisë Çlirimtare të Kosovës, të cilët ndodhen në paraburgim që nga nëntori i vitit 2020.